Fillimi i muajit tetor ka qenë piku i fushatës zgjedhore të rundit të parë për kryetar të Mitrovicës, ku kampet politike nga PDK dhe VV-GUXO kanë qenë shumë të polarizuara. Por që kjo nuk e ka penguar komunën e Mitrovicës të udhëhequr nga Bedri Hamza t’i jap tender favorizues kompanisë “Bageri” Sh.P.K. që në letra figuron pronar Leutrim Shabani, djali i Bujar Shabanit, në kompaninë e të cilit kishte punuar ministri në detyrë i Infrastrukturës nga VV, Hysen Durmishi.
Njoftimi nga Komuna e Mitrovicës për shpalljen fitues të “Bageri” Sh.P.K. për ndërtimin e rrugën “Cen Stantërgu” në Mitrovicë është bërë më 1 tetor 2025, i cili këtë tender e ka fituar me vlerë ofertuese prej 1 milion e 462 mijë 921 euro.
Edhe pse vlera e parashikuar e tenderit nga Komuna e Mitrovicës që udhëhiqej nga Bedri Hamza ishte 1,130,000.00. Pra, kompania e nipit të Bujarit Shabanit e ka fituar këtë tender me 332 mijë euro mbi vlerën e parashikuar.
Veriu.info ka gjetur se Bedri Hamza në cilësinë e Zyrtarit Kryesor Administrativ në Komunën e Mitrovicë ka pasur mundësi të anulumit të këtij tenderit, por siç ka favorizuar për 4 vite kompanitë e afërta me Bujar Shabanin, ka vepruar edhe kësaj radhe duke mos anuluar procedurën e prokurimit.
Neni 43.7 i Rregullores Nr.001/2022 për Prokurim Publik (shkarko rregulloren e plotë KËTU), i mundësonte komunës së udhëhequr nga Bedri Hamza të anulonte tenderin, për arsye se gjithë operatorët e përgjegjshëm ekonomik me ofertat e tyre e tejkalojnë buxhetin e parashikuar të AK (lexo: Autoritetit Kontraktues, në rastin konkret komunës së Mitrovicës), ku në këtë nen thuhet decidivisht:
43.7 Procedura e prokurimit pas hapjes së ofertave mund të anulohet për arsyen e mëposhtme:
a. të gjithë tenderët e përgjegjshëm përmbajnë çmime që e tejkalojnë buxhetin e AK.
Përkundër që është favorizuar kompania e djalit të Bujar Shabanit me 332 mijë euro, punimet në këtë rrugë po përcjellen me ankesa të shumta nga banorët.
Banorët e rrugës “Cen Stantërgu” kanë dërguar në redaksinë e Veriu.info foto të punimeve në rrugë, ku thonë se në vend të zallit, “Bageri” Sh.P.K. në themel të rrugës po shtron copa dheu.
“Në vend të zallit po e shtrojnë rrugën me dhe, sepse është më lirë. Po ashtu edhe gypat e kanalizimit po vendosen përgjyshmë më të ngushtë se sa janë në kontratë“, ka thënë një banor për Veriu.info, pa dashur t’i përmendet emri.
LEXO EDHE:
