Çmimet e karburanteve ranë nën 60 dollarë për fuçi të martën, niveli më i ulët që nga maji, pasi gjasat për një marrëveshje të paqes mes Rusisë dhe Ukrainës dukej se po forcoheshin, duke i shtuar pritjet që sanksionet ndaj Moskës të mund të lehtësohen.
Çmimi i naftës së papërpunuar në bursën “Brent” ra për 1,03 dollar ose rreth 1,7 për qind, në 59,53dollarë për fuçi, ndërsa çmimi në bursën “West Texas Intermediate” ishte 55,76 dollarë për fuçi, për 1,06 dollar ose 1,9 për qind më i ulët se paraprakisht, raporton agjencia e lajmeve “Reuters”.
“Brent-i ra këtë mëngjes në nën 60 dollarë [për fuçi] për herë të parë në muaj, përderisa tregu po vlerëson një marrëveshje të mundshme të paqes që do të rezultonte në vëllime shtesë ruse që do të bëheshin të qasshme e duke e mbifurnizuar më tej tregun” – tha analisti Janiv Shah nga kompania energjetike, “Rystad”.
Gjatë bisedimeve të së hënës, Shtetet e Bashkuara bënë ofertë që Ukrainës t’i ofrohen garanci të sigurisë të stilit të NATO-s dhe negociatorët raportuan për progres, duke nxitur optimizëm se fundi i luftës është më afër.
Ndërkohë, Rusia tha se nuk është e gatshme që të bëjë ndonjë koncesion territorial, citohet të ketë thënë zëvendësministri i Jashtëm, Sergei Ryabkov, sipas raportimit të agjencisë së lajmeve TASS.
Përpos gjasave për arritjen e paqes në Ukrainë, në uljen e çmimeve të karburanteve ndikuan edhe të dhënat për aktivitet të dobët ekonomik në Kinë, duke i shtuar edhe më tej shqetësimet se kërkesa globale për naftë mund të mos jetë mjaftueshëm e fortë për ta thithur rritjen e furnizimit që ka ndodhur rishtazi, tha analisti Tony Sycamore.
Prodhimi në fabrikat e Kinës shënoi rritjen më të ngadalshme në 15 muaj, sipas të dhënave zyrtare. Edhe shitjet me pakcië u rritën me ritmin më të ngadalshëm që nga dhjetori i vitit 2022.
