Sekretari amerikan i Shtetit, Marco Rubio, tha se SHBA do ta gjykojë zëvendëspresidenten e Venezuelës, Delcy Rodríguez, mbi bazën e asaj që ajo do të bëjë në vijim, pasi Presidenti amerikan Donald Trump deklaroi dje se ajo është “në thelb e gatshme të bëjë atë që ne mendojmë se është e nevojshme për ta bërë Venezuelën sërish të madhe”.
Rodríguez e kritikoi ashpër dje operacionin e SHBA-së në vendin e saj, duke kërkuar lirimin e menjëhershëm të Presidentit venezuelan të kapur, Nicolás Maduro, dhe të bashkëshortes së tij Cilia Flores, duke e quajtur Maduro-n “presidentin e vetëm të Venezuelës”.
Por Rubio i tha sot emisionit Meet the Press të NBC-së se “presim të shohim më shumë përmbushje dhe bashkëpunim sesa kemi marrë më parë” nga Venezuela në vazhdim.
SHBA-ja do të “bëjë një vlerësim mbi bazën e asaj që ata (personat aktualisht në krye të Venezuelës) bëjnë, jo asaj që thonë publikisht ndërkohë, jo asaj që e dimë se kanë bërë në të kaluarën në shumë raste, por asaj që bëjnë më tej”, tha ai.
“E di këtë: nëse ata nuk marrin vendimin e duhur, Shtetet e Bashkuara do të ruajnë disa leva për të siguruar që interesat tona të mbrohen, dhe kjo përfshin karantinën e naftës që është në fuqi, ndër të tjera”, shtoi Rubio.
