“Fati Im” apo fati i ministrit? MSh bëhet ‘mburojë’ e spitalit privat ku punon “Zonja e Parë” e shëndetësisë, del kundër inspektores së vet që gjeti shkeljet me licencim

Veriu.info sot ka publikuar një artikull të bazuar në dokumente zyrtare të Inspektoratit Shëndetësor të Ministrisë së Shëndetësisë, ku tregohet se me raportin e inspektimit të datës 24 nëntor 2025 ishte konstatuar se spitali privat special “Fati Im” ishte licencuar kundërligjshëm në 6 veprimtari shëndetësore nga Bordi për Licencimin e Institucioneve Private Shëndetësore.

Skandali me licencimin e “Fati Im”, Inspektorati: Bordi i MSh-së e licencoi kundërligjshëm, siguria e pacientëve dhe embrioneve e shpëtuan nga mbyllja (Dokument)

Mirëpo, ky lajm i publikuar duke u mbështetur në dokumente zyrtare të tyre, nuk i ka pëlqyer Ministrisë së Shëndetësisë, e cila ka zgjedhur një rrugë interesante për t’u përgjigjur.

Në vend që të merrte masa ndaj spitalit “Fati Im” dhe Bordit për Licencimin e tij, Ministria që udhëhiqet nga Arben Vitia ka reaguar duke i shpallur të ‘gabuara’ gjetjet e inspektores të evidentuara përmes procesverbalit dhe raportit të inspektimit.

Reagim “copy-paste” nga rrjetet sociale: A u bë Ministria e Shëndetësisë zëdhënëse e kryetarit të Bordit për të mbuluar shkeljet e evidentuara nga Inspektorati me licencimin e spitalit “Fati Im”?

Në këtë “luftë” të brendshme, Ministria kishte goditur organin e vet, Inspektoratin Shëndetësor, duke i dalë në mbrojtje Bordit për Licencim të kësaj ministrie.

Por duket se ky rreshtim i Ministrisë së Shëndetësisë krah Bordit për Licencim dhe spitalit privat “Fati Im”, mund të mos jetë shumë parimor.

Burime të Veriu.info nga Ministria e Shëndetësisë kanë thënë kjo ministri po e mbron Bordin për Licencimin e Institucioneve Private Shëndetësore, për faktin se në spitalin që inspektorja ka konstatuar se është licencuar kundërligjshëm me gjashtë (6) veprimtari shëndetësore, duke gjetur edhe parregullsi të tjera të funksionimit të tij, punon gruaja e ministrit Arben Vitia.

Me një kërkim në faqen e spitalit special “Fati Im”, Veriu.info ka gjetur se aty punon specialistja e neonatologjisë, Merita Vitia, që është gruaja e ministrit në detyrë të Ministrisë së Shëndetësisë, Arben Vitia.

Merita Vitia kishte punuar edhe vite më parë në këtë spital privat, ku shihet edhe nga postimet në rrjete sociale të saj dhe të spitalit.

Në deklarimin e pasurisë nga Arben Vitia për vitin 2020, ai kishte raportuar si të hyra  pagën e bashkëshortes nga spitali ‘Fati Im” në vlerë mujore prej 1 mijë e 500 euro, ndërsa në deklarimet e pasurisë për vitet 2023 dhe 2024 Arben Vitia kishte deklaruar se bashkëshortja e tij merr pagë vetëm në “Oliver Medical”.