Prokuroria Themelore në Prishtinë ka ndaluar për 48 orë katër persona të dyshuar për vepra penale të korrupsionit dhe falsifikimit, përfshirë një pronar autoshkolle, dy persona nga një tjetër autoshkollë dhe një ekzaminere për patentë shoferi në MMPHI.
Sipas njoftimit, njëri prej të dyshuarve akuzohet për marrje ryshfeti, dy për falsifikim dokumentesh zyrtare dhe një për keqpërdorim të pozitës zyrtare.
“Prokuroria Themelore në Prishtinë, Departamenti për Krime të Rënda, Njësiti për Krime Ekonomike dhe Korrupsion, njofton opinionin publik se, sot me datë 23.03.2026, me vendim të Prokurorit të Shtetit, janë ndaluar për 48 orë, katër persona të dyshuar, njëri me inicialet I.M nga auto shkolla “A…….” për shkak të dyshimit të arsyeshëm se e ka kryer veprën penale “Marrja e ryshfetit” nga neni 421 të KPRK-së, dy persona me inicialet A.B dhe Z.B nga auto shkolla “I………….” për shkak të dyshimit të arsyeshëm se e kanë kryer veprën penale “Falsifikimi i dokumentit zyrtar” nga neni 427 të KPRK-së dhe një person me emrin V.L ekzaminere për patentë shofer në MMPHI për shkak të dyshimit të arsyeshëm se e ka kryer veprën penale Keqpërdorimi i pozitës apo autoritetit zyrtar nga neni 414 të KPRK-së”, thuhet në njoftim.
Gjatë operacionit, në bashkëpunim me Policinë e Kosovës, janë sekuestruar 800 euro ryshfet, janë kontrolluar dy autoshkolla dhe janë konfiskuar telefona mobilë.
“Ky arrestim është zhvilluar në bashkëpunim të ngushtë me hetuesit policor nga Policia e Kosovës, Sektori për Hetimin e Korrupsionit në DHKEK në Prishtinë ashtu që pas zbatimit të masave të veçanta hetimore, të pandehurit I.M. i janë gjetur dhe sekuestruar 800 euro ryshfet të përdorura nga fondi i Policisë së Kosovës, ndërsa në zbatim të Urdhër kontrollit të lëshuar nga Gjykata Themelore në Prishtinë është realizuar kontrolli në dy auto shkollat e cekura më lartë ku janë siguruar provat e nevojshme materiale, ndërsa të pandehurve I.M dhe V.L, u janë sekuestruar telefonat e tyre mobil.
Brenda afatit ligjor, Prokurori i Shtetit, do të dorëzojë në Gjykatë kërkesën për caktimin e ndonjë prej masave për sigurimin e pranisë së të pandehurit në procedurë penale.
Prokurori i Shtetit, mbetet i përkushtuar në luftimin e kriminalitetit dhe korrupsionit si dhe do të ndërmarrë të gjitha veprimet ligjore për parandalimin e këtyre veprave penale si dhe dërgimin para Gjykatës të secilit kryerës të veprave penale”, thuhet në njoftimin e Prokurorisë Themelore në Prishtinë.
