Kur kemi hyrë në mesin e muajit të katërt të vitit 2026, shtatë (7) persona kanë humbur jetën në vendin e tyre të punës, vdekje të cilat ndërlidhen kryesisht me sektorin e ndërtimit në vendin tonë.
Të gjendur përballë kësaj situate dramatike, Inspektorati i Punës ka nisur një aksion në shkallë të gjerë që do të vazhdojë deri në fund të muajit.
Kësaj situate i kanë paraprirë shkelje të shumta të ndërtuesve të objekteve banesore viteve të fundit, të cilët punimet i kryejnë pa masa adekuate mbrojtëse për punëtorët.
Veriu.info ka siguruar dy vendime të Inspektoratit të Punës, të nxjerra vitin e kaluar, me të cilat i ishin ndaluar punimet kompanisë ALBA Sh.P.K, për mungesë të skeleve në hapësirën punuese në objekt banesor.
Vendimi i Inspektoratit të Punës me numër 613 i datës 31.07.2025 konstaton se pas inspektimit të kryer në objektin që po e ndërtonte ALBA Sh.P.K. në Pejë ka mungesë të skeleve dhe ka hapësira të hapura brenda objektit, duke shkelur kështu Ligjin për Sigurinë dhe Shëndetin në Punë.
Me këtë vendim Inspektorati ka urdhëruar kompaninë ndërtuese ALBA Sh.P.K. të bëjë vendosjen e skeleve përreth objektit, mbylljen e hapësirave të brendshme dhe të kufizojë hapësirat e rrezikshme në vendpunishte me rrethoja mbrojtëse.
Për shkak të këtyre gjetjeve, Inspektorati i Punës i kishte ndaluar punimet kësaj kompanie përkohësisht.
Mirëpo, duket se ky vendim nuk kishte bërë që kompania ndërtuese ALBA Sh.P.K. të reflektojë dhe të kujdeset për sigurinë dhe shëndetin e punëtorëve, pasi që me rastin e një inspektimi tjetër të realizuar pas 3 muajsh ishte evidentuar prapë mungesë e skeleve.
Me vendimin e datës 29 tetor 2025, Inspektorati i Punës i kishte ndaluar prapë punimet kompanisë ndërtuese ALBA Sh.P.K., pasi që ishte evidentuar mungesë e skeleve në tërë hapësirën punuese.
Pronarë të kompanisë ALBA Sh.P.K. janë Valdet Deçani, Fisnik Deçani dhe Sejfullah Deçani.
Kjo kompani merret edhe me produkte të sanitarisë, ku në publik njihet me emrin ALBAQERAMIKA.
Përveç selisë qendrore në Graçanicë, sipas regjistrit në ARBK, ALBA Sh.P.K. ka edhe tri njësi biznesore: Njësia Prizren (Dushanovë), Njësia Pejë dhe Alba Real Estate (Pejë).
Veriu.info ka tentuar të marrë një qëndrim nga ALBA Sh.P.K. për këto vendime të Inspektoratit të Punës, por deri në momentin e publikimit të artikullit nuk ka pranuar përgjigje për pyetjet e dërguara.
Më poshtë gjeni pamje të objektit nga momenti i inspektimit të inspektorëve të punës:
