Askujt nuk duhet t’i konvenojnë zgjedhjet.
Kështu vlerëson deputeti i VV-së, Driton Hyseni.
Ai në një intervistë për Gazeta Blic, thotë se zgjedhjet nuk do të prodhonin zgjidhje, pasi sërish të njëjtit liderë do të duhet të ulen dhe të diskutojnë për çështjen e presidentit.
“Mendoj se askujt nuk duhet t’i konvenojnë zgjedhjet e reja. Nuk do të prodhojnë zgjidhje, prapë të njëjtit liderë do të duhet të ulen dhe të diskutojnë se kush do të jetë president i ri. Mendoj se para se të mendohet të zgjedhje të reja, secili nga liderët duhet të mendojë që të angazhohen në këto komunikime, që vendit t’i japin një zgjidhje brenda këtyre 10 ditëve të afatit kushtetues që ka mbetur”, është shprehur ai.
Sipas deputetit, partitë opozitare mendojnë që me zgjedhje do t’ia zbehin fuqinë politike VV-së, që sipas tij është gjë e gabuar.
“Mendoj se zgjedhjet mund të jenë të preferuara ndoshta nga ndonjë parti opozitare që mendojnë se do të kenë fuqi të zbehin fuqinë politike të VV-së, respektivisht edhe numrat që i kemi në Kuvend, mirëpo unë mendoj se qytetarët do ta kenë të qartë edhe në ditët në vijim që qëndrimi i VV-së që vendit t’i japim një udhëheqës të presidencës është tepër i sinqertë, tepër i hapur për të pasur edhe një figurë konsensuale me partitë tjera dhe në këtë drejtim mendoj se çdo kalkulim i partive opozitare që mendojnë se mund ta godasin fuqinë politike të VV-së me zgjedhje të reja do të jetë një ide jo pozitive për to dhe ne do të kemi një rezultat tjetër nga ai që ato mendojnë”, ka theksuar Hyseni.
Ai ka bërë apel te liderët e partive opozitare që të jenë të hapur dhe të propozojnë kandidatë, duke shtuar se ata mund të jenë pjesë e një mundësie historike që të bëhen pjesëmarrës në një vendim pozitiv për vendin.
“Konsideroj se duhet të apelojmë te liderët politikë opozitarë që të jenë konstruktiv në këtë drejtim, të jenë të hapur qoftë në propozimet për emrat e përveçëm që ata mendojnë, që mund të jenë të përgjegjshëm për të kryer funksionet që kërkon presidenca por njëkohësisht të japin kontributin e tyre në Kuvend. Mendoj se e kanë një mundësi historike që të bëhen pjesëmarrës në një vendim pozitiv për vendin dhe uroj që në ditët në vijim ta kemi një zgjedhje”, ka deklaruar deputeti i VV-së, Driton Hyseni.
