Një tender me vlerë rreth 3 milionë euro ishte shpallur nga Komuna e Mitrovicës që udhëhiqej nga ish-kryetari Bedri Hamza në qershor të vitit të kaluar, por për shkak të ankesave ishte pezulluar e rishpallur përfundimisht në vlugun e fushatës zgjedhore të zgjedhjeve lokale, përkatësisht më 9 tetor 2025.
Për shkak të procedurave dhe ankesave të shumta që është përcjellë ky tender për asfaltimin e rrugëve në fshatrat Bajgorë, Rashan, Tërstenë, Kutllovc dhe Vllahi, Komisioni për Vlerësimin e Tenderit përfundimisht më 30 prill 2026 ka shpallur fituesin e tij, që është konzorciumi Dio Bes Sh.P.K. dhe Eurokos Holding Sh.P.K., raporton Veriu.info.
Edhe pse në faqen zyrtare të e E-prokurimit nuk ka dalë njoftimi, Veriu.info ka siguruar “Njoftimin mbi vendimin e autoritetit kontraktues dhe letra standarde” dhe “Raportin e vlerësimit të tenderit” nga Komisioni komunal për vlerësimin e këtij tenderi.
Sipas njoftimit të dërguar operatorëve konkurrues, i cili në javën e ardhshme bëhet publik në faqen e e-prokurimi, Komisioni Vlerësues ka eliminuar dy ofertues më të lirë, me arsyetimin se nuk i plotësojnë kriteret dhe ka shpallur fitues konzorciumin Dio Bes Sh.P.K. dhe Eurokos Holding Sh.P.K., i cili ka ofertuar me çmim prej 3 milionë e 88 mijë euro.
Në raportin e vlerësimit të tenderit të siguruar nga Veriu.info, njëri nga anëtarët e Komisionit, Rexhep Hajdari e ka kundërshtuar shpalljen fitues të konzorciumit Dio Bes Sh.P.K. dhe Eurokos Holding Sh.P.K., me arsyetimin se nuk i plotëson kushtet e tenderit.
Rexhep Hajdari është i vetmi anëtar Komisioni që është me profesion inxhinier që lidhet me punët që kanë të bëjnë në tender dhe njëkohësisht U.D. Shef i Shërbimeve Publike në Drejtorinë e Shërbimeve Publike dhe Infrastrukturës, sektor ky që lidhet direkt me zbatimin e kontratës. Përderisa dy anëtarët e tjerë vijnë nga Drejtoria e Shëndetësisë dhe Drejtoria e Emergjencave, drejtori këto që nuk kanë të bëjnë asgjë me punët e planifikuara në kontratë e as profesionet e tyre nuk lidhen me ndërtimin e rrugëve, pasi që njëri anëtar është gjeolog e tjetri ekonomist.
Në faqen 21 të raportit të vlerësimit të tenderit nga komisioni i caktuar nga Komuna e Mitrovicës, thuhet që anëtari Rexhep Hajdari nuk është pajtuar që ky konzorcium të shpallet fitues, për shkak se: “Anëtari Rexhep Hajdari deklaron se GOE (Grupi i Operatorëve Ekonomik) Dio Bes Sh.P.K. dhe Eurokos Holding Sh.P.K. nuk i plotëson kushtet e DT-së (Dosjes së Tenderit) sa i përket inxhinierëve (menaxherin e projektit dhe udhëheqësin e punishtes), gjithashtu referencat e punëve nuk i plotësojnë kushtet e DT-së”.
Siç shihet në faqen 17 të raportit të vlerësimit, çështja kontestuese për Dio Bes Sh.P.K. dhe Eurokos Holding Sh.P.K. kishte të bënte me origjinën e diplomave e tyre, pasi që të njëjtat ishin lëshuar nga Universiteti i Tiranës dhe nuk kishte garanci për barazvlefshmërinë e kualifikimit të kërkesuar nga autoriteti kontraktues në dosjen e tenderit. Për më tepër, në raport nuk bëhet e ditur se këta dy drejtues të projektit a i kanë diplomatë e nostrifikuara në Kosovë, kusht ky i domosdoshëm që një diplomë e huaj të vlejë në shtetin tonë.
Kush janë Dio Bes Sh.P.K. dhe Eurokos Holding Sh.P.K.?
Kompania Dio Bes Sh.P.K. është e themeluar në vitin 2020 me pronar Xhelal Shabani dhe në ARBK figuron se ka të punësuar 2 punëtorë.
Xhelal Shabani është vëllai i Bujar Shabani, pronari i “Bageri Company”, kompani kjo për të cilën është raportuar në media vazhdimisht që është e favorizuar me tender milionësh nga Ministria e Infrastrukturës.
Raportimet për favorizim të saj nga Ministria e Infrastrukturës për ndërtimin e rrugëve, kishin të bënin kryesisht me faktin se Ish-zëvendës ministri dhe ish-ministri i kësaj ministrie, Hysen Durmishi, para disa vitesh kishte punuar në Bageri Company të Bujar Shabanit, ku vazhdimisht është dëshmuar afërsia mes tyre edhe në vitet vijuese.
Tenderi për asfaltimin e rrugëve në fshatrat Bajgorë, Rashan, Tërstenë, Kutllovc dhe Vllahi që është fitues nga Dio Bes Sh.P.K. dhe Eurokos Holding Sh.P.K. është një projekt që bashkëfinancohet nga Komuna e Mitrovicës dhe Ministria e Infrastrukturës, në krye të së cilës në momentin e shpalljes ishte Hysen Durmishi, shoku dhe ish punëtori i vëllaut të fituesit të tenderit.
Pasi që ishte bërë zëvendës ministër i Ministrisë së Infrastrukturës, ishte publikuar në media një foto e Hysen Durmishit duke ngrënë akullore me Sokol Shabani, nipin e Bujar Shabani, që konsiston të jetë djali i Xhelal Shabani, fituesit të tenderit 3 milionësh në Mitrovicë.
Ndërkaq, edhe emri i kompanisë Eurokos Holding Sh.P.K. lidhet në media kryesisht me emrin e Bujar Shabanit, pronarit të Bageri Company, që është shok i Hysen Durmishit.
Eurokos Holding Sh.P.K. kishte fituar tenderin për ndërtimin e dy urave mbi lumin Ibër, përderisa në vendpunishte për ndërtimin e këtyre dy urave ishin parë makineria e Bageri Company, duke ngjallur dyshime se kush në të vërtetë qëndron pas projektit dhe tenderit. (https://veriu.info/hysen-durmishi-zihet-ngushte-nga-pyetjet-pasi-qe-ura-e-ibrit-u-testua-pikerisht-me-kamionat-e-dostit-te-tij-bujar-shabanit-te-bageri-company-j/)
Vetëm disa orë para se të votohej Qeveria Kurti 3, Ministria e udhëhequr nga Hysen Durmishi ka dhënë tenderë në vlerë 19 milionë euro, ku në mesin e kompanive përfituese ishin edhe: Bageri Sh.P.K., Dio Bes Sh.P.K., Eurokos Holding Sh.P.K., etj. (https://veriu.info/si-i-ndau-durmishi-rreth-19-milione-euro-ne-oret-e-fundit-si-minister-u-shperblyen-edhe-dostat-e-tij/)
Përveç nga Komisioni Vlerësues, kontratat për tenderët në vlerë milionëshe duhet të nënshkruhen edhe nga Zyrtari Kryesor Administrativ i autoritetit kontraktues (komunës), e që nuk dihet se a do të pranojë kryetari Faton Peci të nënshkruajë një tender të tillë me dyshime e kundërshtime nga anëtari profesional i komisionit vlerësues.
Gjatë mandatit të kaluar qeverisës në Mitrovicës kompanitë e familjes së Bujar Shabanit nga Ferizaj kanë qenë fituesit kryesor të tenderëve në këtë qytet, avaz ky që duket se ka nisur edhe me qeverisjen aktuale. Pra, partitë që udhëheqin Mitrovicën shkojnë e vijnë, por konstantja e tenderëve në këtë komunë është familja Shabani!
LEXONI EDHE:
