Saranda Keqekolla ishte ndër avokatet e para që ngriti publikisht dyshimet për skema të organizuara kriminale të manipulimeve me prona në lagjen Veternik, duke denoncuar rastin e familjes Sadiku, të cilëve iu ishte marrë prona me dokumente të falsifikuara.
Në paraqitjen publike në emisionin Betimi për Drejtësi, familja Sadiku kishte folur për mënyrën se si funksiononte grupi i organizuar kriminal me lidhje të forta me persona që mbanin pozita drejtuese në institucione kyçe të drejtësisë dhe administratës publike.
Sipas deklarimeve publike të bëra në atë kohë, në këto raste dyshohej për përfshirje të personave zyrtarë nga institucione të ndryshme, përfshirë kadastrin, policinë, prokurorinë dhe gjykatat.
Familja Sadiku kishte ngritur shqetësimin se, pavarësisht peshës së rëndë të veprave penale dhe dëmit të madh në këto raste, personave të arrestuar gjykata u kishte caktuar masa më të lehta të sigurisë në procedurë penale, krahasuar me rastet kur të dyshuar janë qytetarët e thjeshtë, pra gjykatat po punojnë me standarde të dyfishta.
Avokatja Saranda Keqekolla për këtë rast kishte folur edhe ne pocastin “Përballje me Gazin” (minuta 20:30 – VIDEO: https://www.youtube.com/watch?v=UJRsuJulMfs)
Personat e arrestuar gjatë kësaj jave në rajonin e Prishtinës, sipas raportimeve publike, janë po të njëjtit emra që familja Sadiku i kishte përmendur publikisht vite më parë në emisionin “Betimi për Drejtësi”, përfshirë Mihajlo Milovanoviç, Mejreme Bajrami, Afrim Gashi, si dhe zyrtarë policorë të dyshuar për përfshirje në këto raste.
Rasti ka rikthyer në vëmendje diskutimin publik se si po funksionon sistemi gjyqësor dhe prokurorial përballë këtij grupi, ku sipas dosjes së prokurorisë, Alfred Ismajli dyshohet se, nga data 12 mars 2024 deri më 21 janar 2026, ka keqpërdorur detyrën zyrtare duke bashkëpunuar me të dyshuarin Mihajlo Milovanoviç për t’i ndihmuar në tjetërsimin e parcelës kadastrale nr. 1662-0, me sipërfaqe 5,976 m², përmes dokumenteve të falsifikuara dhe bartjen e saj tek Zeljko Jagodiç.
Bion Beqiri dyshohet se, në cilësinë e hetuesit, ka keqpërdorur detyrën dhe autorizimet zyrtare duke vepruar në bashkëpunim dhe nën udhëzimet e Alfred Ismajli në trajtimin e një rasti që lidhet me parcelën kadastrale nr. 1662-0 me sipërfaqe 5,976 m².
Artan Shala dyshohet se ka keqpërdorur detyrën dhe tejkaluar kompetencat zyrtare duke bashkëpunuar me persona të tjerë për sigurimin e certifikatave të pronave publike, të cilat më pas dyshohet se përdoreshin nga Mihajlo Milovanoviç për falsifikim dokumentesh, me qëllim që pronat të paraqiteshin si të rregullta dhe të shiteshin për përfitime të kundërligjshme.
Një tjetër aksion i gjerë i Drejtorisë për Hetimin e Krimeve Ekonomike dhe Korrupsionit ka tronditur kryeqytetin të enjte, tre persona, mes të cilëve figura të njohura publike dhe zyrtarë komunalë, janë vënë në pranga nën dyshime të rënda për falsifikim dokumentesh, mashtrim dhe legalizim të përmbajtjes së rreme lidhur me tjetërsimin e pronave.
Nw kwtw aksion ishin arrestuar Fitim Sertolli, zyrtar në Drejtorinë e Gjeodezisë dhe Kadastrit në Komunën e Prishtinës, Ndriçim Sogojeva dhe Liridon Restelica. Ky grup dyshohet se ka bashkëpunuar në një skemë komplekse për manipulimin e dokumenteve pronësore, duke dëmtuar interesin publik dhe privat.
Ky aksion vjen si vazhdimësi e një hetimi që ka nisur muaj më parë. Më 25 shkurt 2026, për të njëjtin rast ishin arrestuar edhe dy persona të tjerë, Mihajlo Milovanovic dhe Zhelko Jagodic.
Rolex, Q7 – Kush është i arrestuari për dallavere me prona që ishte drejtues i Prishtina Parking?
