Një video e siguruar nga Policia ka çuar në identifikimin dhe ndalimin e një personi në Prizren, i cili dyshohet se kishte shtënë me armë gjatë një ahengu familjar, mëson Sinjali nga burime të afërta me hetimin.
Burimet bëjnë të ditur se bëhet fjalë për Endrit Blerim Shishkon (31-vjeçar).
Sipas informatave, rasti kishte ndodhur më 14 maj 2026 rreth orës 00:30 në fshatin Reçan të Prizrenit.
Sinjali mëson se Policia kishte pranuar një video-incizim ku shiheshin disa persona në një aheng, ndërsa njëri prej tyre dyshohet se shtinte me armë.
Pas analizimit të pamjeve, hetuesit kanë arritur ta identifikojnë të dyshuarin, të cilit më pas i ishte dërguar ftesë për paraqitje në stacion policor.
Burimet bëjnë të ditur se ai është paraqitur vetë në Stacionin Policor në Prizren rreth orës 23:30 të së njëjtës ditë, duke dorëzuar: një armë me gaz, dhe një karikator, me të cilat, sipas deklarimit të tij, kishte shtënë gjatë ahengut.
Pas konsultimit me Prokurorin e Shtetit, ndaj tij është iniciuar rasti: “Mbajtje në pronësi, kontroll ose posedim të paautorizuar të armëve” dhe “Përdorim i armës apo mjetit të rrezikshëm”.
Me aktvendim të Prokurorit, i dyshuari është ndaluar për 48 orë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
