Policia e Kosovës sot ka arrestuar kandidatin për deputet nga radhët e Partisë Demokratike të Kosovës, Qëndrim Kryeziu, pasi ky i fundit kishte hyrë brenda hapësirës ku po rrënohej objekti i pompës Patroni e ndërtuar në pronë të Ministrisë së Bujqësisë.
Lidhur me këtë rast ende nuk ka një reagim nga kryetari i PDK-së, Bedri Hamza, lidhur me veprimin e kandidatit të partisë së tij për deputet, i cili po pengonte aksionin e organeve të rendit për lirimin e hapësirave publike, raporton Gazeta Online Veriu.info.
Hamza përmes këtij veprimi po jep shembull të keq, duke mos nxjerrë asnjë zë për anëtarin e partisë së tij, i cili mundohej të pengonte zbatimin e ligjit.
Aq më shumë kur jemi në fushatë zgjedhore dhe partitë politike do të duhej të ishin të kujdesshme në mesazhin që japin për zbatimin e ligjit në vend.
Kryeziut disa herë ju kërkua largimi nga ajo hapësirë nga zyrtarët policor por ai vazhdonte të kërkonte dokument për rrënimin e objektit, që siç thotë është e dajës së tij.
Ndryshe ministria e Bujqësisë ka njoftuar se me vendim të Ministrit në detyrë të Bujqësisë, Pylltarisë dhe Zhvillimit Rural, Armend Muja, sot ka filluar rrënimi i objekteve të ndërtuara në pronën që i takon Ministrisë së Bujqësisë, Pylltarisë dhe Zhvillimit Rural.
Njoftimi i plotë i MBPZhR-së:
Me vendim të Ministrit në detyrë Armend Muja fillon lirimi dhe rikthimi në funksion publik i pronës 1.2 hektarëshe të MBPZhR-së:
Me vendim të Ministrit në detyrë të Bujqësisë, Pylltarisë dhe Zhvillimit Rural, Armend Muja, sot ka filluar rrënimi i objekteve të ndërtuara në pronën që i takon Ministrisë së Bujqësisë, Pylltarisë dhe Zhvillimit Rural.
Ky veprim përbën një hap të rëndësishëm drejt kthimit të pronës publike në funksion të interesit qytetar dhe zhvillimit institucional të Republikës së Kosovës. Njëkohësisht, sot është zbatuar edhe vendimi i gjykatës lidhur me këtë pronë, duke respektuar plotësisht procedurat dhe dispozitat ligjore në fuqi.
Prona, me sipërfaqe totale prej 1.2 hektarësh, është në administrim të Ministrisë së Bujqësisë, Pylltarisë dhe Zhvillimit Rural dhe do të shfrytëzohet për projekte me interes publik.
Sipas planifikimeve institucionale, në këtë hapësirë do të krijohet një zonë e gjelbër, si dhe do të ndërtohet objekti i ri i Ministrisë së Bujqësisë, Pylltarisë dhe Zhvillimit Rural, projekt ky me rëndësi për zhvillimin institucional dhe urban të vendit.
Ministri në detyrë, Armend Muja, ka theksuar se institucionet do të veprojnë me vendosmëri ndaj çdo uzurpimi, ndërtimi pa të drejtë apo shfrytëzimi të paligjshëm të pronës publike, duke garantuar mbrojtjen e interesit publik dhe administrimin e rregullt të pronave në dobi të qytetarëve.
