Komisioni Qendror i Zgjedhjeve (KQZ) ka anuluar tri aktivitete të prokurimit, që kishin të bënin me nevojat e institucionit dhe të qendrave komunale të numërimit (QKN) dhe Qendrën për Numërimin e Rezultateve (QNR), në kuadër të zgjedhjeve të parakohshme të 7 qershorit.
Sipas njoftimeve të publikuara nga KQZ-ja, fillimisht është anuluar aktiviteti i prokurimit, i cili ishte ritenderim për furnizimin me kabllo, raporton IndeksOnline.
Për këtë procedurë ishte pranuar vetëm një ofertë, por autoriteti kontraktues vendosi ta ndërpresë aktivitetin për shkak të arsyeve objektive dhe të demonstrueshme që ishin jashtë kontrollit të KQZ-së dhe të paparashikueshme në momentin e inicimit të procedurës.
Në informacionet shtesë, KQZ-ja ka sqaruar se anulimi erdhi si pasojë e problemeve teknike në sistemin e E-prokurimit.
Ndërkohë, dje KQZ-ja anuloi edhe një procedurë tjetër, e cila kishte të njëjtin objekt – furnizimin me kabllo vazhduese për nevojat zgjedhore.
Për këtë aktivitet nuk ishte pranuar asnjë ofertë, ndërsa si arsye e anulimit është përmendur fakti se një dispozitë e ligjit për prokurimin publik kërkonte anulimin e aktivitetit.
Në sqarimet shtesë, KQZ-ja ka bërë të ditur se procedura u anulua pasi nuk kishte asnjë ofertues të interesuar.
Nga ana tjetër, është anuluar edhe aktiviteti i prokurimit për furnizim me paleta druri, për Qendrën për Numërimin e Rezultateve.
Sipas njoftimit, aktiviteti u anulua pasi një dispozitë në ligjin e prokurimit publik kërkoi anulimin e aktivitetit, sakaq nuk pati asnjë ofertues në këtë aktivitet.
Të gjitha procedurat ishin planifikuar të realizoheshin sipas kriterit të çmimit më të ulët dhe kishin për qëllim sigurimin e pajisjeve të nevojshme për organizimin e procesit zgjedhor.
Mbetet të shihet se si KQZ-ja do të bëjë zgjidhje për këto tri çështje, me ditën e zgjedhjeve që është 4 ditë prej sot.
