Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, që mban datën 27 prill 2026, me të cilin spitali “Bahceci Healthcare” Sh.P.K. me themelues Ahmet Hamdi Bahçeci është gjobitur me 2 mijë euro për shkelje të Ligjit për Shëndetësi, pasi që ka ushtruar veprimtarinë pa përmbushur kushtet ligjore.
Në arsyetimin e vendimit për gjobitjen e spitalit “Bahceci” me numër protokolli 05-723 të Inspektoratit Shëndetësor, thuhet se gjatë inspektimit është konstatuar se në vend pune nuk ka qenë prezent biokimisti i licencuar, Dr. Atakan Koro pa ndonjë arsyetim, edhe pse ky është obligim ligjor.
Si gjetje tjetër, inspektorët shëndetësorë kanë evidentuar mos prezantimin e evidencës së stafit, i cili tregon se profesionistët shëndetësorë a kanë qenë prezent gjatë kryerjes së shërbimeve shëndetësore.
Shkeljet e evidentuara gjatë këtij inspektimi nuk ndalen me kaq, pasi që është konstatuar se shërbimet laboratorike nuk realizohen në laborator brenda Spitalit Special, por mostrat e gjakut merren dhe dërgohen për analizë në laborator të jashtëm, përkundër që marrëveshja e bashkëpunimit me këtë laborator të jashtëm ka skaduar.
Sipas inspektorëve shëndetësorë, këto analiza jashtë spitalit “Bahceci” janë kryer pa siguruar mbikëqyrje profesionale brenda tij.
Problemet e spitalit “Bahceci” me biokimistin kanë vazhduar edhe më tutje, pasi që inspektorët shëndetësorë kanë konstatuar se në regjistrin e pacientëve nuk është evidentuar biokimisti përgjegjës.
“Këto shkelje përbëjnë ushtrim të veprimtarisë laboratorike në kushte të parregullta, pa prezencën e stafit profesional/biokimistit përgjegjës, pa mbikëqyrje profesionale dhe pa bazë të vlefshme juridike, si dhe funksionim në kushte të papajtueshme për shkak të pajisjeve laboratorike jashtë funksionit, duke cenuar cilësinë dhe sigurinë e shërbimeve shëndetësore të ofruara për pacientët. Këto veprime dhe mosveprime përbëjnë mosrespektim të detyrimeve ligjore në kundërshtim me nenin 40 dhe nenin 42 të Ligjit Nr. 04/L-125 për Shëndetësi. Në bazë të konstatimeve të raportit dhe të dispozitave të sipërpërmendura ligjore, plotësohen kushtet për shqiptimin e gjobës ndaj institucionit, siç është përcaktuar në dispozitiv të këtij vendimi”, thuhet në vendimin e Inspektoratit Shëndetësor për gjobitjen e spitalit “Bahceci” që funksionon në kilometrin e 9-të të magjistrales Prishtinë-Shkup.
Pra, për të gjitha këto shkelje, spitali “Bahceci” është gjobitur me vetëm 2 mijë euro nga inspektorja Safete Llugiqi, që më shumë duket si gjobë qesharake.
Veriu.info ka tentuar të marrë një qëndrim nga “Bahceci Healthcare” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk ka pranuar përgjigje për pyetjet e dërguara, edhe pse e kanë konfirmuar pranimin e e-mailit.
LEXONI EDHE:
‘Bahceci’ është spitali privat që u bastis për trafikim organesh njerëzore – arrestohen 4 punonjës
Mbyllet shërbimi i IVF-së në spitalin “Bahceci”, embrionet dërgohen në QKUK
