Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor Qendra Diagnostikuese Mjekësore “QDT Medina” Sh.P.K. është gjobitur me 3 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor që e ka siguruar Veriu.info, thuhet se inspektimin më 20 shkurt e kanë kryer pas një ankese që kanë pranuar.
Inspektorët shëndetësorë gjatë këtij inspektimi kanë konstatuar se në laboratorin mjekësor biokimik hematologjik dhe laboratorin mjekësor mikrobiologjik të poliklinikës “QDT Medina” ofrohen shërbime laboratorike pa praninë e specialistit të biokimisë klinike dhe pa praninë e specialistit të mikrobiologjisë, gjë që, sipas vendimit, kjo bie në kundërshtim me Udhëzimin Administrativ të Shëndetësisë.
“Nga të dhënat e nxjerra nga regjistrat e pacientëve dhe rezultatet e lëshuara nga ky institucion privat shëndetësor, ndër të tjera të pasqyruara në institucionin privat shëndetësor “QDT Medina SHPK”, janë kryer analiza gjenetike si double test, triple test, analiza biokimike si vitamina D₃, prolaktina, tumor markeret (CEA, CA 15-3), TSH, T3, T4, anti TPO, anti TG, … po ashtu janë hasur rezultate të analizave për strisho vaginale, strisho cervikale, chlamydia test, strishonga [sic] rrëva, të gjitha këto shërbime të ofruara në këtë institucion privat shëndetësor duke mos qenë të licencuara në Divizionin për Licencim dhe Akreditim në Ministrinë e Shëndetësisë”, thuhet në vendimin për gjobitjen e kësaj poliklinike.
Të gjeturat e inspektorëve shëndetësorë në poliklinikën “QDT Medina” nuk kanë përfunduar me kaq, pasi që ata kanë hasur në shërbimin e mikrobiologjisë rezultate të analizave që nuk ishin të licencuara dhe në të cilat është vendosur dhe nënshkrimi i laborantes Agnesa Luzha, por jo nënshkrimi dhe vula e Specialistit të Mikrobiologjisë Klinike sipas legjislacionit në fuqi në RKS.
Inspektorët kanë konstatuar si shkelje ligjore edhe mosrespektimin e orarit të punës të laboratorëve mjekësor biokimik-hematologjik dhe të mikrobiologjisë, pasi që është gjetur se aty punohet jashtë orarit të deklaruar në Divizionin për Licencim dhe Akreditim të Ministrisë së Shëndetësisë.
Megjithatë, akoma në ueb-faqen e “QDT MEDINA” shkruan se laboratori i kësaj poliklinike funksionon nga ora 07:00 deri në 22:00.
Kush është QDT MEDINA Sh.P.K.?
Qendra Mjekësore MEDINA është e themeluar në vitin 2013 në Ferizaj nga Shqipe Murati, e cila zotëron 100% të aksioneve të kompanisë.
Në ARBK si aktivitet kryesor ka të deklaruar aktivitetet e spitaleve, përderisa si aktivitet sekondar ka deklaruar se i ka aktivitetet e mjekësisë së praktikës së përgjithshme.
LEXONI EDHE:
