Hetimet e Byrosë Kombëtare të Hetimit (BKH) dhe SPAK-ut kanë vënë në shënjestër Shkëlzen Betajn, ish-zëvendësdrejtori i Hipotekës së Tiranës, i cili brenda pak vitesh nga zyrtar shtetëror është shndërruar në një nga investitorët më të mëdhenj të ndërtimit në vend. Betaj dhe rrjeti i tij i ortakëve dyshohet se po përdorin projekte ndërtimi për të pastruar para me origjinë nga veprimtari të shumta kriminale dhe korruptive.
Hetimet përfshijnë verifikimin e dosjeve të regjistruara në ZVRPP Tiranë, tjetërsimin e pronave gjatë kohës që Betaj shërbente në Hipotekë, si dhe përfitimet nga tenderët publikë të manipuluar.
Paratë që ushqejnë këtë rrjet dyshohet se rrjedhin nga rrjetet e basteve ilegale (si p.sh. linjat “CR7” dhe “333”), call-center-at mashtruese, trafiku i lëndëve narkotike dhe skemat e shitblerjes së votës.
Roli i “kumbarit”: Në dosjet hetimore përmendet emri i kryetarit të PSD-së, Tom Doshi, si figura kyçe që qëndron prapa orientimit të këtyre fondeve drejt ndërtimit dhe kontrollit mbi ndarjen e fitimeve.
Projektet kryesore dhe mungesa e transparencës:
Kompanitë e përfshira, si “SIAN Buildings Albania”, “Lunor” dhe “Ultra-Tech” (e kontrolluar nga vëllezërit Sinanaj), kanë siguruar leje për pesë kulla dhe komplekse luksoze, ndonëse disa prej tyre janë regjistruar me një kapital minimal prej vetëm 100 mijë lekësh dhe pa deklaruar bilance financiare:
Kulla 25-katëshe në bllokun e ambasadave në Tiranë (mes Rrugës së Kavajës dhe Rrugës së Durrësit).
“Taylor of Tirana” në zonën e Ali Demit, e cila lidhet drejtpërdrejt me paratë e basteve ilegale dhe përdor skema paralelesh shitjeje për të qarkulluar para jashtë sistemit bankar.
Kompleksi 18-katësh në Velipojë me pishina e infrastrukturë turistike, si dhe dy projekte të tjera polifunksionale që arrijnë deri në 35 kate në kryeqytet.
Pavarësisht se BKH ka dërguar materialet në SPAK dhe dosjet ndodhen në sirtarët e hetuesve, punimet në këto kulla vazhdojnë pa u penguar, ndërsa autoritetet po vijojnë krehjen e pasurive të paluajtshme të lidhura me këtë rrjet, raporton Pamfleti.
