Veriu.info ka raportuar dje se si kryetari i komunës së Mitrovicës, Bedri Hamza, kishte nënshkruar kontratë në vlerë prej 892 mijë euro për asfaltimin e rrugës “Lah Nimani”, e cila është në gjatësi prej vetëm 394 metra. Po ashtu në shkrimin e Veriu.info pasqyrohej fakti se si pozicionet e kësaj kontrate për matjet gjeodezike të kësaj rruge do t’i kushtonin komunës 92 mijë euro, çmim ky astronomik duke pasur parasysh faktin se çmimi real i tregut për matjen e 1 km rrugë lokale sillet rreth 2 mijë euro.
Një tentativë për të demantuar lajmin e bëri sot komuna e Mitrovicës përmes një reagimi (lexo KËTU) në faqen e saj, po që me asnjë pjesë të shkrimit nuk dëshmonte fakte ndryshe prej atyre të paraqitura nga Veriu.info, por vetëm sa e konfirmonte çmimin e nënshkrimit të kontratës për të cilin kishim raportuar.
Ndër të tjera,Veriu.info kishte raportuar se në tenderin e shpallur nga komuna e Mitrovicës për ndërtimin e rrugës “Lah Nimani” çmimi i parashikuar ishte 600 mijë euro, të cilin e kishte kalkuluar komuna si vlerë reale me rastin e shpalljes së tenderit. Mirëpo, komuna e shpalli fitues dhe Bedri Hamza e nënshkroi kontratën me me Grupin e operatorëve ekonomik: Bujar Shabani B.I., Kosova asfalt Sh.P.K., EL-BAU Sh.P.K., Urban O.P., ku oferta e tyre ishte 892,453,40 euro, shumë të cilën do ta paguajë komuna me rastin e ndërtimit të kësaj rruge.
Në reagimin e sotëm të komunës ndër të tjera thuhet: “Qytetarët e Mitrovicës i njoftojmë që të gjitha procedurat e prokurimit kanë qenë të hapura, transparente dhe janë publikuar në mënyrë elektronike, me datën 29.06.2022, me numër të Prokurimit: 642 – 22 – 6315 – 5-1-1 dhe janë respektuar me përpikëri të gjitha procedurat e LPP-së dhe gjithashtu janë respektuar rekomandimet të cilat i ka parashtruar Organi Shqyrtues i Prokurimit dhe Autoriteti Kontraktues ka bërë përmirësimet e duhura sipas këtyre rekomandimeve”. Pra, thuhet se janë respektuar në përpikmëri gjitha procedurat e Ligjit të Prokurimit Publik, e që në asnjë pjesë të artikullit të shkrimit të djeshëm Veriu.info nuk kishte thënë se nuk janë respektuar këto dispozita. (Për të lexuar reagimin e plotë të komunës klikoni KËTU)
Mirëpo, problemi qëndron te fakti se komuna e Mitrovicës ka pasur mundësi ligjore të anulojë tenderin, në të cilin gjithë operatorët ekonomik kishin ofertuar me çmime qindra-mijëra euro më të larta se vlera reale e parashikuar nga komuna e Mitrovicës, e që ishte 600 mijë euro.
Pra, edhe pse komuna me mekanizmat e vet kishte parashikuar se ndërtimi i kësaj rruge prej 394 metrash do të kushtojë 600 mijë, nuk ka aplikuar mundësitë që i jep Rregullorja Nr.001/2022 për Prokurim Publik, e cila është nxjerrë nga Komisioni Rregullativ i Prokurimit Publik.
Veriu.info ka zbuluar se Neni 43.7 Rregullores Nr.001/2022 për Prokurim Publik (shkarko rregulloren e plotë KËTU), i mundësonte komunës së udhëhequr nga Bedri Hamza të anulonte tenderin, për arsye se gjithë operatorët e përgjegjshëm ekonomik me ofertat e tyre e tejkalojnë buxhetin e parashikuar të AK (lexo: Autoritetit Kontraktues, në rastin konkret komunës së Mitrovicës), ku në këtë nen thuhet decidivisht:
43.7 Procedura e prokurimit pas hapjes së ofertave mund të anulohet për arsyen e mëposhtme:
a. të gjithë tenderët e përgjegjshëm përmbajnë çmime që e tejkalojnë buxhetin e AK.
Më gjithë këtë dispozitë ligjore të favorshme për komunën e Mitrovicës për rastin në fjalë, kryetari Bedri Hamza kishte zgjedhur të nënshkruaj kontratën me vlerë prej 892 mijë euro, që është 48% vlerë më e madhe se sa çmimi i parashikuar nga komuna, duke ia rritur komunës prej 292 mijë euro koston e ndërtimit të rrugës në raport me çmimin e kalkuluar me rastin e shpalljes së tenderit.
Ndryshe, komuna e Mitrovicës u ka dhënë këtë tenderë për ndërtimin e rrugës dy biznesmenëve të akuzuar për mashtrim, Bujar Shabanit e Fatlum Pirevës. Bujar Shabani, pronari i “Kosova Asfalt” akuzohet nga Prokuroria Themelore në Ferizaj për keqpërdorim dhe mashtrim në prokurim publik. Shabani i cili njëherit është edhe shok i afërt me zëvendësministrin e Infrastrukturës, Hyseni Durmishi do të përballët me gjykatën. Ai rrezikon të dënohet deri në pesë vite për mashtrimet me procedurat tenderuese. Ndërsa, pronari i “El Bau Sh.P.K”, Fatlum Pireva ngarkohet nga Prokuroria Themelore në Gjilan për veprën penale mashtrim. Fatlum Pireva së bashku me Suad Pirevën dhe Muhadin Zukën dyshohet si i ka shkaktuar dëm Komunës së Gjilanit. Detajet i gjeni në shkrimin e mëposhtëm.
Në linqet e publikuara më poshtë gjeni shkrimet e publikuara nga Veriu.info për këtë rast, në të cilat gjendet edhe reagimi i komunës:
