Bashkimi Evropian ka mirëpritur faktin që pas disa muajsh ngërç, Kuvendi i Kosovës më në fund është bërë me kryetar duke përsëritur thirrjen për përmbyllje sa më të shpejtë të procesit të konstitumit të plotë të organit ligjvënës.
Në një përgjigje për gazetën online Reporteri.net, nga zyra e BE-së në Prishtinë kanë thënë se nënkryetari i Kuvendit nga radhët e komunitetit serb duhet të zgjidhet në përputhje të plotë me frymën e Kushtetutës.
“Bashkimi Evropian është i inkurajuar nga fakti që më në fund është zgjedhur Kryetari i Kuvendit, dhe ripërsërit thirrjen për konstituimin e shpejtë të Kuvendit përmes zgjedhjes së nënkryetarit të që përfaqëson komunitetin serb. Kjo duhet të bëhet në përputhje të plotë me tekstin dhe frymën e Kushtetutës dhe rregullave përkatëse. Nxisim përfaqësuesit politikë të zgjedhur të bashkëpunojnë dhe të gjejnë shumicën e nevojshme në interes të Kosovës, shoqërisë së saj multietnike dhe të ardhmes evropiane”, thuhet në përgjigjen e Zyrës së BE-së në Kosovë, për gazetën online Reporteri.net.
Pas 57 seancave, deputeti i Lëvizjes Vetëvendosje, Dimal Basha, të martën u zgjodh kryetar Kuvendi. Kuvendi zgjodhi edhe tre nënkryetarë nga partitë shqiptare: Albulena Haxhiun, Vlora Çitakun dhe Kujtim Shalën.
Emilija Rexhepi u zgjodh nënkryetare nga pakicat joserbe, megjithatë procesi i konsituimit ka mbetur ende në gjysmë. Tash e dy seanca, ka dështuar zgjedhja e Nënkryetarit të Kuvendit nga komuniteti serb.
Të martën kur edhe u zgjodh kryetari i Kuvendit dhe nënkryetarët tjerë, Sllavko Simiq është propozuar tri herë nga Lista Serbe – partia më e madhe e serbëve në Kosovë – mirëpo nuk i ka marrë votat e nevojshme, 61 sosh.
Kryetari Basha ka konsideruar se emri i tij është shfrytëzuar, në përputhje me një aktgjykim të Gjykatës Kushtetuese të disa ditëve më parë se një person nuk mund të kandidohet më shumë se tre herë. Lista Serbe ka insistuar se vendimi vlen për pozitën e kryetarit dhe jo për nënkryetarët.
Basha, më pas, e ka nisur një proces të propozimit me short të kandidatëve për nënkryetarin serb, por asnjëri nuk i ka marrë 61 votat e domosdoshme. Propozimi me short vazhdoi edhe në seancën e djeshme, por pa sukses.
Përveç disa deputetëve të tjerë të Listës Serbe, për këtë post u propozua edhe Nenad Rashiq nga partia serbe Për Liri, Drejtësi dhe Mbijetesë. As Rashiq në dy votime nuk i mori votat e mjaftueshme për tu zgjedhur kryetar i Kuvendit. Ai mund të propozohet vetëm edhe një herë.
Ndërkohë, Lista Serbe ditën e djeshme ka paralajmëruar se do t’i drejtohet Gjykatës Kushtetuese, me pretendimin se u shkel rendi kushtetues dhe të drejtat e komunitetit serb.
Kuvendi konsiderohet i konstituuar vetëm pasi të zgjidhen të pesë nënkryetarët dhe më pas nis rrjedhja e afatit ligjor për formim të Qeverisë.
Seanca konstituive ka nisur 15 prill. Deri tash janë mbajtur 59 vazhdime të saj. Një tentativë tjetër për zgjedhjen e nënkryetarit të Kuvendit nga radhët e komunitetit serb, do të bëhet nesër.
