Federata e Futbollit të Bosnje-Hercegovinës (NFSBiH) ka njoftuar këtë të premte se ka aranzhuar një ndeshje miqësore me Rusinë, me këtë të fundit që janë të përjashtuar nga çdo garë zyrtare e FIFA-s dhe UEFA-s shkaku i agresionit të shtetit rus mbi Ukrainën.
Megjithatë, kjo nuk i ka penguar Federatës boshnjake që të pranoi një ofertë për t’u zhvilluar një ndeshje miqësore mes ekipeve përfaqësuese të këtyre dy shteteve, shkruan Gazeta Express.
NFSBiH bëri të ditur se ka pranuar ofertën që ndeshja miqësore të zhvillohet në Shën Petersburg, më 19 shtator.
Pas kësaj reagimet ishin të shumta, teksa një të tillë e ka bërë edhe Miralem Pjanic.
Mesfushori i njohur e ka cilësuar këtë si vendim jo të mirë, derisa e ka bërë të qartë sërish qëndrimin e tij.
“Kam dëgjuar për vendimin e Federatës. Liderët e aleancës e dinë qëndrimin tim. Më telefonuan, më pyetën se çfarë mendoja për lojën. Thashë atë që mendoja dhe më pas u befasova nga një vendim tjetër. Nuk është një vendim i mirë”, tha ai për “Sportske.ba”.
“Jam pa fjalë. Kur kombëtarja fillon të luajë mirë, gjithmonë diçka nuk shkon. Unë jam pa fjalë. NFSBiH e di pozicionin tim. Thjesht do të them që kjo nuk është mirë”, shtoi ish-mesfushori i Barcelonës.
Sipas mediumit nga Bosnje-Hercegovina, tifozët boshnjakë po bëjnë thirrje për bojkot të ndeshjes. Ata gjithashtu po kërkojnë zgjedhje të reja në Federatën e Futbollit.
“Sportske.ba” gjithashtu ka shkruar se Miralem Pjanic nuk do të udhëtojë drejt Rusisë për këtë ndeshje.
