KQZ-ja e ka dërguar në MPB dhe në MPJD listën me kandidatët për deputetë të Listës Serbe, mirëpo asnjë përgjigje nuk ka marrë nga këto institutcione që drejtohen nga Xhelal Sveçla e Donika Gërvalla. Nuk i kanë thënë KQZ-së mos i certifikoni, por kanë heshtur.
Në përpjekje për të siguruar bazën ligjore dhe verifikimin e të dhënave për certifikimin e kandidatëve të Listës Serbe për zgjedhjet parlamentare të 9 shkurtit, Komisioni Qendror i Zgjedhjeve (KQZ) i është drejtuar dy ministrive, Ministrisë së Punëve të Brendshme (MPB), e cila drejtohet nga Xhelal Sveçla, dhe Ministrisë së Punëve të Jashtme dhe Diasporës (MPJD), që drejtohet nga Donika Gërvalla.
Kërkesa për një përgjigje nga këto institucione ka pasur për qëllim verifikimin e listës së kandidatëve të propozuar nga Lista Serbe dhe përcaktimin nëse këta kandidatë përmbushin kushtet ligjore për të marrë pjesë në procesin zgjedhor.
Megjithatë, as MPB-ja dhe as MPJD-ja nuk kanë dhënë një përgjigje zyrtare ndaj kërkesës së KQZ-së.
Paparaci ka siguruar dokumentin e Zyrës për Regjistrimin, Certifikimin dhe Kontrollin Financiar të Subjekteve Politike në KQZ, ku ndër tjera ceket edhe mos ofrimi i informatave të kërkuara nga këto dy ministri.
“Ministria e Punëve të Jashtme dhe Diasporës, nëse kandidati anëtar i shërbimit të jashtëm dhe përfaqësues diplomatik (për këtë subjekt politik, MPJD nuk ka dërguar informata në lidhje me verifikimin, sipas kërkesës së Zyrës).
Ministria e Punëve të Brendshme, nëse kandidati është funksionar publik me status të veçantë, në bazë të ligjit në fuqi për zyrtarët publik (për këtë subjekt politik, MPB nuk ka dërguar informata në lidhje me verifikimin, sipas kërkesës së zyrës)”, thuhet në dokumentin e siguruar.
Megjithatë, kjo zyrë kishte rekomanduar certifikimin e Listës Serbe dhe kandidatëve të këtij subjekti politik.
“Pas verifikimit paraprak që është ndërmarrë nga Zyra, dhe pas pranimit të informatave nga verifikimet e institucioneve, siç përcaktohet me nenin 30 të LZP, në përputhje me paragrafin 4 të nenit 17 të Ligjit për Zgjedhjet e Përgjithshme në Republikën e Kosovës, Zyra i rekomandon KQZ:
-Certifikimin e subjektit politik SRPSKA LISTA dhe kandidatëve të këtij subjekti politik për pjesëmarrjen në Zgjedhjet për Kuvendin e Republikës së Kosovës që mbahen me datën 09.02.2025″, thuhet në dokument.
Kjo heshtje ka krijuar një situatë të paqartë, pasi institucionet nuk kanë marrë një qëndrim të prerë – as duke refuzuar, as duke aprovuar certifikimin e kandidatëve.
Në mbledhjen e së hënës, KQZ ka vendosur të mos e certifikojë Listën Serbe – partinë më të madhe të serbëve në Kosovë, për pjesëmarrje në zgjedhjet parlamentare të 9 shkurtit.
Përfaqësues të partisë në pushtet, Lëvizjes Vetëvendosje (LVV), kanë dalë kundër certifikimit të kësaj partie – e cila gëzon mbështetjen e Beogradit zyrtar – duke përmendur që kjo parti nuk e njeh shtetin e Kosovës, dhe atij nuk i referohet me emrin zyrtar, por si “Kosova dhe Metohia”.
Lista Serbe e ka konsideruar vendimin si të kundërligjshëm dhe ka paralajmëruar se kryetari i partisë, Zllatan Ellek, do të japë më shumë hollësi në paraditen e së martës.
