Drejtori i Arsimit në komunën e Vushtrrisë, Albanez Tahiraj, ka thënë se çerdhja në fshatin Sllatinë do të bëhet, raporton Gazeta Online Veriu.info.
Tahiraj përmes një shkrimi në Facebook i ka reaguar kandidatit të LDK-së, Xhafer Tahiri, i cili derisa Idrizi përmendi çerdhen në Sllatinë tha se aty edhe shkolla pritet të mbyllet.
Tahiraj tha se kandidati i LDK-së nuk ka pikë informacioni për Vushtrrinë dhe fshatrat e kësaj komune, pasi fshati Sllatinë i ka 37 fëmijë nga mosha 0 deri në 4 vjet kurse fshati më i afërt Banjska i ka 67 fëmijë.
Postimi i plotë:
Ç𝐞𝐫𝐝𝐡𝐣𝐚 𝐧ë 𝐒𝐥𝐥𝐚𝐭𝐢𝐧ë 𝐝𝐨 𝐭ë 𝐛ë𝐡𝐞𝐭
Ish-kryetari i Vushtrrisë, Xhafer Tahiri mbrëmë në debat në RTV 21, ka treguar edhe njëherë pse ka qenë kaq skandaloze qeverisja e tij për 4 vite, dhe se si ai edhe me këtë kandidaturë e ka të përkohshme Vushtrrinë dhe interesimin për të.
Xhafer Tahiri bëri një huqje të madhe siç di zakonisht t’i bëjë, sepse nuk ka pikë informacioni për komunën, fshatrat e popullsinë, sfidat e kërkesat e tyre.
Për kujtesë, sipas regjistrimit të popullsisë 2024, dhe Agjencionit të Statistikave të Kosovës, në Sllatinë nga mosha 0 deri në 4 vjet janë 37 fëmijë, ndërkaq, në fshatin më të afërt Banjskë janë gjithsej 67 fëmijë.
Pra, janë mbi 100 fëmijë që do të frekuentojnë këtë çerdhe, e si rrjedhojë një numër i madh i grave do të ketë hapësirë që të integrohet në tregun e punës.
Këto janë planet tona për Vushtrrinë, kërkesat në terren të qytetarëve, e zgjidhjet që do t’i bëjmë realitet pas 12 tetorit.
