Nëse dikush mendon që mashtrime me çmime nga rrjetet e super marketeve janë raste të izoluara, e ka gabim. Ky dëmtim i konsumatorëve përmes çmimeve ndryshe në rafte e oferta dhe çmimeve më të larta në arkë, është shndërruar në fenomen në Kosovë.
Në kuadër të hulumtimit për mashtrimeve me çmime që po u bëhen konsumatorëve në Kosovë nga rrjetet e marketeve, Veriu.info ka siguruar dokumente me të cilat dëshmohet se edhe kompania “Albi Shopping” Sh.P.K., është gjobitur për shkelje të tilla. Por si zakonisht kur është fjala për biznese të fuqishme, gjoba edhe për këtë rast është ‘simbolike’ në raport me fuqinë ekonomike të kompanisë.
Pas një ankese të bërë nga konsumatorja E.M., inspektorët e Inspektoratit Qendror të Mbikëqyrjes së Tregut të Ministrisë së Tregtisë kanë realizuar një vizitë inspektuese muajin e kaluar në një pikë të kompanisë “Albi Shopping” Sh.P.K. në Prishtinë, ku kanë konstatuar se kompania me pronar Tahir Humolli ka shitur produkte me çmim më të lartë se sa në ofertën e prezantuar në publik, raporton Veriu.info.
Në ofertën që vlente për periudhën 27 shkurt deri më 5 mars 2026, të prezantuar nga kompania “Albi Shopping” Sh.P.K. në publik, përfshirë edhe rrjetet sociale, çmimi për produktin “Patate me hudhër të ngrira 600g Aviko” ishte 1.35 euro me zbritje nga 1.79, sa ishte çmimi standard.
Por inspektorët e IQMT-së pas realizimit të vizitës inspektuese kanë konstatuar se çmimi në raft i këtij produkti ishte 1.89 euro, ndërsa me zbritje në arkë kalonte për 1.79 euro.
Për shkak të kësaj shkeljeje ligjore që është mashtrim klasik me çmime të produkteve, inspektorët e IQMT-së e kanë gjobitur kompaninë “Albi Shopping” Sh.P.K. me 1 mijë e 100 euro, gjobë të cilën nëse e paguan brenda afatit prej 15 ditësh lirohet nga 50% e shumës.
Veriu.infoka gjetur se oferta për këtë produkt për të cilin është gjobitur kjo kompani, është ende publike në rrjete sociale të Albi.
Ndryshe, kompania “Albi Shopping” Sh.P.K. është në pronësi të biznesmenit Tahir Humolli, i cili është edhe përfaqësues i autorizuar i kompanisë. “Albi Shopping” Sh.P.K. ka në pronësi qendrën tregtare Albi Mall në Veternik të Prishtinës dhe një rrjet të super-marketeve anembanë Kosovës.
LEXONI EDHE:
