Kryetari i Komunës së Fushë Kosovës, Valon Prebreza, ka thënë se e ka përnjëmend çështjen e tarifës rrugore për hyrje në këtë komunë. Kjo, me kushtin nëse Komuna e Prishtinës që udhëhiqet nga Përparim Rama e miraton rregulloren që përcakton tarifën prej 10 eurove për hyrje në kryeqytet.
I pari i komunës së Fushë Kosovës tha se nëse kalon, ai do ta bëjë 20 euro taksën për hyrje në Fushë Kosovë dhe 10 euro për të hyrë në rrugën e Aeroportit të Prishtinës. Tha se e kalon lehtë, meqë numrat në Kuvendin Komunal i ka.
“Kjo është një e padrejtë që i bëhet krejt shqiptarëve të Republikës. Nëse e mendojmë për pozitë strategjike, nuk ka qytetar i Republikës së Kosovës që nuk kalon kah Fushë Kosova. Me këtë logjikë, nëse kjo kalon, shpresoj shumë që s’kalon, nëse kjo kalon, unë kam me e bë 20 euro për qytetarë të Prishtinës. Nesër e kam takimin me grupin punues për hartimin e rregulloreve për taksa dhe tarifa dhe disa rregullore të tjera. Është fillimi i kësaj procedure. Nëse kjo kalon në Prishtinë, të njëjtën kemi me e bë edhe për Fushë Kosovë”, deklaroi Prebreza për Insajderin.
Ai tha se kjo logjikë e të menduarit legjitimon caktimin e rregullave të veta nga secila komunë.
“Me qit logjikë të menduarit, atëherë i bie që secila komunë me vendos rregulla të veta, unë me qit tarifa ta zëmë për ndërmarrje që operojnë këtu, tymin e KEK-ut, kabllat e KEDS-it, KOSTT-it, me qisi logjike, pra veç pse kalon kah unë”, tha më tej Prebreza.
I pyetur nga Gazeta Insajderi nëse postimi i tij, i cili paralajmëronte një tarifë të tillë ishte i njëmendtë, tha se çështjen e taksës e ka shumë seriozisht.
“Është kryeqytet, është e drejtë e secilit qytetar. Prandaj janë krejt institucionet qëndrore atje, dikush me u çu në krye në vete me vendos taksë, më së shumti penalizohemi ne si Fushë Kosovë që jemi afër këtu. Kjo është me i kallëzu atij (Përparim Ramës) që s’bëhet kjo. Nëse e bën, unë e bëj 20. Edhe në rrugë të aeroportit e qes trahun aty, 10 euro kush don me hi anej. Unë tu keshë e kam qitë atë, çkado që na bjen ndërmend. Hiç nuk është hajgare, seriozisht e bëj. Nëse kjo kalon, edhe unë e bëj”, vijoi më tej kreu i komunës së Fushë Kosovës.
Kuvendi Komunal i Prishtinës e miratoi të martën propozimin që draft-rregullorja që parasheh taksën ditore 10 euro të lihet për shqyrtim në dëgjim publik.
Rregullorja u promovua nga drejtori i Shërbimeve Publike, Luftar Braha, i cili tha se ka për qëllim të krijojë një sistem të drejtë ku secili subjekt që operon në kryeqytet kontribuon në mënyrë të barabartë për shërbimet komunale.
