Vetëm pak javë pasi i dha fund karrierës si gjyqtar, ish-arbitri i Premierligës, Anthony Taylor, ka nisur një kapitull të ri në futboll.
47-vjeçari njoftoi pensionimin më 21 korrik, vetëm disa ditë pasi drejtoi dy ndeshje në Kupën e Botës 2026 – sfidën e fazës së grupeve mes Senegalit dhe Irakut, si dhe fitoren e Spanjës ndaj Portugalisë në fazën e 1/8 së finales.
Karriera e Taylorit përfshiu plot 831 ndeshje, ndërsa arbitri nga Manchesteri drejtoi 432 ndeshje të Premier League gjatë 16 sezoneve. Ai gjithashtu gjykoi disa finale të kupave vendore.
Përveç kësaj, 47-vjeçari ishte arbitri kryesor i finales së Ligës së Kampionëve në vitin 2024 dhe drejtoi 163 ndeshje ndërkombëtare.
Në deklaratën me të cilën njoftoi pensionimin, Taylor e përshkroi arbitrimin si një “privilegj të jashtëzakonshëm”, por edhe një profesion që sjell vazhdimisht “presion” dhe “vëmendje të madhe”.
“Tani është momenti i duhur për t’u tërhequr dhe për të nisur kapitullin e ri të karrierës sime.
Dua të shpreh mirënjohjen time më të thellë për dy ndihmësit e mi, Gary dhe Adam, kolegët arbitra dhe të gjithë njerëzit e përfshirë në futboll për mbështetjen e tyre gjatë gjithë këtyre viteve.
Mbi të gjitha, dua të falënderoj familjen dhe miqtë e mi për mbështetjen e palëkundur gjatë gjithë sakrificave që ka kërkuar kjo karrierë.”
Megjithatë, vetëm dy javë pas largimit nga fusha, Taylor ka bërë të ditur se ka marrë detyrën e Drejtorit të Arbitrimit Elitar në Federatën Turke të Futbollit.
Në një postim në LinkedIn ai shkroi: “Pas njoftimit tim të fundit se po tërhiqem nga arbitrimi elitar pas 16 sezonesh, kam kënaqësinë të ndaj hapin e radhës në karrierën time.
Duke filluar nga sot, do të marr rolin këshillues si ‘Drejtor i Arbitrimit Elitar’ në Federatën Turke të Futbollit.
Pasi kam gjykuar në nivelet më të larta të futbollit vendas dhe ndërkombëtar, e mirëpres mundësinë për ta sjellë këtë përvojë në një rol të fokusuar në zhvillimin strategjik dhe teknik të arbitrimit elitar në Turqi.
Do të punoj me kolegët në Federatë për të mbështetur zhvillimin e mëtejshëm të arbitrave dhe për të forcuar programin e arbitrimit, në përputhje me standardet e UEFA-s dhe FIFA-s.
Emërimi erdhi pas diskutimeve të detajuara në Stamboll dhe dua ta falënderoj Fraser Williamson që më përfaqësoi gjatë gjithë procesit.
Mezi pres t’i bashkohem Federatës Turke të Futbollit dhe të kontribuoj në fazën e ardhshme të zhvillimit të arbitrimit.”
Emërimi i Taylorit vjen vetëm 10 muaj pasi një hetim zbuloi se 371 nga 571 arbitrat e futbollit në Turqi kishin llogari bastesh, duke bërë që presidenti i Federatës Turke të Futbollit, İbrahim Hacıosmanoğlu, të deklaronte:
“Duhet të pastrojmë çdo papastërti që ekziston”.
