Ish-menaxheri i Michael Schumacher, Willi Weber, ka drejtuar akuza në drejtim të familjes së legjendës së F1, duke thënë se ata e gënjyen në lidhje me gjendjen shëndetësore të gjermanit gjatë kohës kur u aksidentua teksa po skijonte, në vitin 2013.
Në një intervistë të dhënë për Gazzetta dello Sport tha se është ende i nervozuar me faktin se familja e ish-pilotit të Mercedesit e kanë mbajtur larg klientit të tij dhe i kanë treguar vazhdimisht gënjeshtra për gjendjen e tij shëndetësore.
Siç dihet, nga ai aksident, Schumacher përfundoi në koma dhe iu kthye vetëdija plotësisht tek pasi kaluan gjashtë muaj.
Teksa e kujton këtë rast, Weber thotë se ishte një dhimbje e madhe për të se si u neglizhua interesimi i tij.
“Ishte një dhimbje e madhe për mua. Tentova qindra herë të merrja në kontakt Cronnian për ta pyetur për gjendjen e Schumacher, por nuk përgjigjej”, tha fillimisht ai.
“Jam akoma i nervozuar. Nuk e prisja një sjellje të tillë nga ta. Ata më neglizhonin mua, më thonin se është tepër herët. Në fakt ishte vonë, tashmë kanë kaluar nëntë vite. Duhet të më thonin se si ishte”, shtoi Weber.
“Fillimisht mund ta kuptoja situatën dhe bëja gjithçka që mundja për ta mbrojtur jetën private të Schumacher. Por, që prej atëherë, unë dëgjova vetëm gënjeshtra. Ai ishte si një djalë për mua, ende sot më dhemb të flas për këtë situatë”, përfundoi ai.
Aksidenti i gjermanit tronditi botën e sportit të cilët u shokuan kur morën vesh për mënyrën dhe rrjedhojat e asaj përplasjeje.
Ndonëse ai e kishte një helmetë për skijim, lëndimi ishte aq i madh sa shkaktoi tronditje trunore te gjermani.
