Ish-mesfushori serb, Lazar Markovic, konsiderohet si një ndër transferimet më të dështuara nga Liverpool në shekullin e 21’të. Ai pasi kaloi tre vite te Partizani i Beogradit tani ka kaluar te Gaziantep, skuadra ku bën pjesë edhe sulmuesi kosovar, Valmir Veliu.
Gjatë ditës së djeshme skuadra turke bëri të ditur se ka arritur marrëveshje me Lazar Markovic, i cili pasi mbeti lojtar i lirë nënshkroi kontratë dy-vjeçare me Gaziantep.
28-vjeçari kishte kaluar te Liverpool në vitin 2014 nga Benfica për shumën e 25 milionë eurove, por ai asnjëherë nuk i shpagoi ato të holla të paguara për të nga ‘The Reds’.
Pas disa huazimeve në disa ekipe si Fenerbahce, Sporting, Hull City dhe Anderlecht nënkampionët e Europës në vitin 2019 shkëputën kontratën me të dhe ai lidhi marrëveshje si transferim i lirë me Fulham, por edhe aty dështoi për të kaluar pastaj te Partizani i Beogradit.
Kujtojmë se nëse Markovic është transferuar si lojtar i lirë te Gaziantep, për Valmir Veliun ekipi turk ka paguar te Llapi 180 mijë euro për të siguruar shërbimet e tij. /gazetametro.net
