Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin subjekti privat shëndetësor “Fiziocromed” Sh.P.K. me themelues Sami Pllana është gjobitur me 4 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e “Fiziocromed” Sh.P.K. të siguruar nga Veriu.info, thuhet se inspektimi është realizuar më 17 prill 2026 në bazë të një ankese që ka marrë.
Gjatë inspektimit është konstatuar se “FIZIOCROMED” Sh.P.K. ushtronte veprimtari shëndetësore pa qenë i pajisur me licencë institucionale nga Divizioni për Licencim dhe Akreditim i Institucioneve Private Shëndetësore në Ministrinë e Shëndetësisë, në kundërshtim me dispozitat ligjore në fuqi.
Si shkelje tjetër është evidentuar se personeli që ofronte shërbime shëndetësore, Sami Plana dhe Silvana Berisha, gjatë inspektimit nuk kanë prezantuar dëshmi për licencim profesional, duke ushtruar kështu veprimtari pa autorizim përkatës profesional.
“Regjistri i pacientëve ishte jo funksional, pacientët ishin të regjistruar në fletore jorzyrtare që përmbajnë të dhëna personale dhe shërbimet e ofruara, jashtë formave të lejuara ligjore dhe pa standarde të mbrojtjes së të dhënave në kundërshtim me Udhëzimin Administrativ Nr. 02/2010. Subjekti ka kryer reklamim të shërbimeve shëndetësore përmes rrjeteve sociale, duke krijuar perceptim të ofrimit të shërbimeve profesionale të licencuara, pa përmbushur kushtet ligjore për ushtrimin e këtyre shërbimeve. Është konstatuar mungesa e antishok terapisë, që është obligative për institucionet që ofrojnë shërbime shëndetësore. Në subjekt ishin të pranishme mjetet dhe pajisjet medicinale për ofrimin e shërbimeve shëndetësore”, thuhet në vendimin e Inspektoratit Shëndetësor të siguruar nga Veriu.info.
Sipas Inspektoratit Shëndetësor, këto shkelje përbëjnë shkelje të dispozitave ligjore në fuqi përkatësisht të Ligjit Nr. 04/L-125 për Shëndetësi, duke rrezikuar dhe cenuar shëndetin e pacientëve.
Në vendim nuk bëhet e ditur nëse është ndaluar veprimtaria shëndetësore e “FIZIOCROMED” apo është lejuar të vazhdojë.
Veriu.info ka tentuar të marrë një qëndrim nga “FIZIOCROMED” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
