Duke parë katrahurën me ndërtime të larta në vende që po e prishin pamjen e kryeqytetit dhe po e vështirësojnë jetën e qytetarëve, Komuna e Prishtinës që udhëhiqet nga Përparim Rama, ka nisur një plan strategjik për rregullim urban dhe ndalim të ndërtimeve të larta në qendër të Prishtinës.
Sipas burimeve të gazetës Veriu.info brenda Komunës së Prishtinës, institucionet komunale kanë nisur analizat për uljen e ndjeshme të koeficientit të ndërtimit në disa prej zonave më të urbanizuara të kryeqytetit, si masë për të adresuar problemet e krijuara nga mbingarkesa në trafik dhe mungesa e hapësirave publike.
Burimet tona bëjnë të ditur se lagjet Pejton dhe Lakrishte janë ndër zonat kryesore që po analizohen, pas shtimit të konsiderueshëm të ndërtesave shumëkatëshe gjatë viteve të fundit. Sipas të njëjtave burime, infrastruktura aktuale rrugore nuk është projektuar për të përballuar fluksin e automjeteve dhe numrin në rritje të banorëve e bizneseve në këto zona.
Si rezultat, Komuna me arkitektë nderkombëtarë është duke shqyrtuar mundësinë e uljes së koeficientit të ndërtimit në mënyrë që zhvillimi urban në të ardhmen të jetë më i balancuar dhe më i qëndrueshëm.
Sipas informacioneve të siguruara nga gazeta Veriu.info, pjesë e propozimeve që po diskutohen është edhe vendosja e një koeficienti maksimal ndërtimi prej 1.8, si dhe përcaktimi që parcelat për zhvillim të kenë një sipërfaqe minimale prej 60 ari të bashkuara, me qëllim që projektet e ardhshme të planifikohen në mënyrë më funksionale dhe të krijojnë më shumë hapësira të gjelbra, sheshe publike dhe infrastrukturë përcjellëse.
Po sipas burimeve tona, vizioni afatgjatë nuk kufizohet vetëm në uljen e intensitetit të ndërtimit. Në planet zhvillimore po shqyrtohet krijimi i më shumë parqeve, këndeve të lojërave për fëmijë, çerdheve publike, parkingjeve nëntokësore dhe hapësirave rekreative, me synimin që lagjet qendrore të Prishtinës të kenë një zhvillim më të qëndrueshëm urban dhe një cilësi më të lartë të jetesës.
Megjithatë, deri në këtë fazë nuk është marrë ende një vendim zyrtar dhe analizat janë ende në proces. Nëse këto propozime miratohen, ato pritet të përfshihen në dokumentet e reja të planifikimit urban dhe në ndryshimet e Planit Zhvillimor të Komunës së Prishtinës.
Veriu.info do të vazhdojë ta ndjekë nga afër këtë proces dhe do ta informojë publikun për çdo zhvillim dhe vendim zyrtar lidhur me të ardhmen urbanistike të kryeqytetit.
