Presidentja e 6-të e Republikës së Kosovës, dhe kandidatja për Presidente e LDK-së Vjosa Osmani, ka njoftuar për përfshirjen e FSK-së si një nga vendet e para kontribuuese në Forcën Ndërkombëtare të Sigurisë (ISF), një strukturë e angazhuar në përpjekjet për stabilizim dhe siguri, brenda Bordit të Paqes që Osmani pak muaj më parë kishte nënshkruar në Davos me ftesë të Presidentit Trump.
Në një reagim publik, Presidentja Osmani theksoi se ky zhvillim është rezultat i bashkëpunimit të ngushtë strategjik me Shtetet e Bashkuara të Amerikës dhe Presidentin amerikan, duke e cilësuar pjesëmarrjen e Kosovës si një hap të rëndësishëm në forcimin e rolit të vendit në nismat ndërkombëtare për paqe dhe siguri.
“Board of Peace” ka mirëpritur dy oficerë ndërlidhës nga Forca e Sigurisë së Kosovës, majorët Gentrit Idrizi dhe Labinot Lala.
Sipas njoftimit zyrtar, angazhimi i tyre synon lehtësimin e shkëmbimit të informacionit mes ISF dhe shteteve pjesëmarrëse, si dhe forcimin e koordinimit operacional në kuadër të përpjekjeve ndërkombëtare për stabilitet.
