Janë mësuar detaje ekskluzive lidhur me incidentin e rëndë që ndodhi pasditen e sotme në lagjen Dardania të Prishtinës, ku një person i armatosur ka sulmuar dhe kanosur zyrtarë policorë gjatë intervenimit në një rast dhune familjare.
Burime të besueshme të gazeta Sinjali bëjnë të ditur se personi i arrestuar është Zenel Kuqi (51 vjeçar), banues në Prishtinë, i cili është përballur me njësinë policore me armë në dorë, duke refuzuar çdo urdhër për dorëzim.
Sipas hetimeve, rasti është regjistruar më 31 tetor 2025, rreth orës 14:50, në rrugën “Lekë Dukagjini”, hyrja 3/2, ku policia ishte angazhuar për të ndërhyrë në një rast të raportuar dhune familjare. Në momentin e mbërritjes, zyrtarët kanë dëgjuar zhurma të forta dhe pas hapjes së derës janë përballur me Kuqin, i cili mbante në dorë një armë zjarri dhe kishte gjak në duar.
Pavarësisht urdhrave të përsëritura për ta lëshuar armën, i dyshuari ka shfaqur rezistencë aktive, ka kanosur policët, dhe vetëm pas ndërhyrjes me forcë, njësia ka arritur ta neutralizojë situatën dhe ta arrestojë.
Gjatë incidentit, dy zyrtarë policorë kanë pësuar lëndime të lehta, ndërsa në vendngjarje janë konfiskuar arma e zjarrit me leje, dy karikatorë dhe rreth 120 fishekë.
Pas veprimeve hetimore, në koordinim me Prokurorin Kujdestar, është inicuar rasti “Sulm ndaj personit zyrtar gjatë kryerjes së detyrës zyrtare”, dhe ndaj Zenel Kuqit është caktuar masa e ndalimit policor për 48 orë.
Hetimet për këtë rast janë në zhvillim./Sinjali.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
