Ministri i Mbrojtjes i Kosovës, Ejup Maqedonci, ka deklaruar se Forca e Sigurisë së Kosovës (FSK) mund të shkojë në veri të Kosovës duke u koordinuar me KFOR-in, e sipas tij, mospërfshirja e FSK-së pas sulmit të fundit në veri ndërlidhet me zotimin e 2013-s.
Ai ka thënë se është në koordinim dhe bashkëpunim me KFOR-in, derisa bëri me dije se pas çdo incidenti në veri ka komunikuar me KFOR-in.
“Në vazhdimësi gjatë çdo incidenti në veri kemi komunikuar me KFOR-in. Edhe më 24 shtator kam kontaktuar me KFOR-in, kam shprehur gatishmërinë që me trupa e njësi të specializuara të mbështesim. Normalisht në momentet kur e vlerësojnë… Nuk ka diçka që ka ndaluar, por thjesht kërkohet një koordinim paraprak”, ka thënë Maqedonci në KTV.
Ministri i Mbrojtjes ka shtuar se edhe pas sulmit të fundit në kanalin e Ibër-Lepencit ka kontaktuar me KFOR-in, e këtë shtoi se e ka bërë edhe kryeministri Albin Kurti dhe ministri i Brendshëm, Xhelal Sveçla.
“Besoj se kërkesa është diskutuar me kryeministrin, për të mbështetur Policinë dhe KFOR-in për të kryer misionin e tyre në veri. KFOR-i nuk është forcë penguese, por për siguri e stabilitet e një forcë partnere. Me një mandat të NATO-s e s’e konsiderojmë ndalesë faktin se duhet të koordinohemi me ta. FSK-ja është forcë e dizajnuar për të operuar në çdo pjesë të Kosovës. Ne synojmë të bëjmë koordinim paraprak me KFOR-in kur ka nevojë të operohet. KFOR-i ka mandat për t’i ruajtur kufijtë, për të mos lënë rikthimin e forcave okupatore serbe. E nëse KFOR-i vazhdon të tregon seriozitetin në raport me mandatin”, është shprehur ai.
“Kur vlerësohet se ka nevojë për pjesëmarrje, FSK-ja do të jetë atje (në veri) e kjo do të bëhet në koordinim me KFOR-in. Vlerësoj se FSK-ja ka mandat për të operuar në tërë territorin. Kërkesa për koordinim është çështje operacionale, e jo mandati. Nuk vihet në pikëpyetje apo mandati të jetë FSK-ja në veri, në pyetje është aspekti operacional dhe nevoja për koordinim”, ka shtuar ai.
Sipas Maqedoncit, në 2013-n ish-kryeministri Hashim Thaçi ishte zotuar për këtë çështje “jo me dëshirën e tij”.
“Asnjë kryeministër s’do të bënte zotim të njëanshëm, vlerësoj se ka pasur marrëveshje me anë të së cilës është kërkuar të zotohet për mosangazhim të FSK-ja në veri me KFOR-in. Nuk pajtohem që ai zotim të bëhej në atë kohë kur FSK-ja kishte mandat të kufizuar. Vlerësoj se vendi duhet të respektojë zotimin. Ky zotim është bërë në një organizëm ku synojmë të jemi shumë shpejt”, ka shtuar ai.
