Kylian Mbappé beson se ky është viti i tij për Topin e Artë. Ylli i Real Madridit këmbëngul se paraqitjet e tij sezonin e kaluar e bëjnë atë fituesin më të merituar, pavarësisht mungesës së trofeve kolektive.
“Kam një ndjesi se mund ta fitoj këtë vit. Është një nga objektivat e mi dhe nuk ka mbetur edhe shumë kohë”, i tha Mbappé “L’Équipe”, duke shtuar se nuk sheh asnjë kundërshti mes një çmimi individual dhe vlerës së trofeve të ekipit.
Ai vazhdoi: “Gjithmonë kam besuar se Topi i Artë duhet t’i jepet një lojtari vërtet të jashtëzakonshëm. Sigurisht që ekziston edhe aspekti kolektiv, sepse futbolli është sport ekipor, por në fund të fundit është një çmim individual”.
Ai shpjegoi se këndvështrimi i tij për këtë çmim u formësua gjatë epokës së Lionel Messit dhe Cristiano Ronaldos.
Vetëbesimi nuk është diçka që i mungon.
“Prej vitesh, e konsideroj veten lojtarin më të mirë në botë. Nuk kam parë asnjë lojtar më të mirë se unë”, tha sulmuesi, duke shtuar se e pranonte që Messi ose Ronaldo ta ngrinin trofeun, por nuk do të kishte ndërruar vendin me askënd tjetër që e ka fituar atë.
Kritikët kanë vënë në pikëpyetje angazhimin e tij në fazën defensive dhe Mbappé reagoi ashpër. Sipas tij, shënimi i golave nuk mund të jetë kurrë problem për një ekip.
“Ky argument është i palogjikshëm. Nëse nuk shënoj, do të pyesin: pse? Futbolli ka të bëjë me shënimin e golave dhe mposhtjen e kundërshtarit”, tha ai.
Megjithatë, ai pranoi se mund të japë më shumë pa topin. Për të ardhmen, ai beson se mund të krijojë edhe më shumë raste, duke këmbëngulur se ka një talent të rrallë në këtë aspekt dhe nuk ka ndërmend të largohet nga elita.
Fishkëllimat në “Bernabéu” gjithashtu nuk e shqetësojnë.
“Këto gjëra ndodhin. A e dini sa lojtarë janë fishkëllyer në Madrid? Të gjithë janë ende gjallë”, tha ai, duke shtuar se tani i kupton tifozët që thjesht shprehin zhgënjimin e tyre kur janë të pakënaqur.
Lëvdatat e tij shkuan edhe për trajnerin José Mourinhon, të cilin Mbappé e cilësoi jashtëzakonisht inteligjent.
“Ai e di se çfarë po bën dhe ku po shkon. Është e rëndësishme që lojtarët të kenë udhëzime që duhet t’i ndjekin. Me të, kemi gjithçka që na nevojitet për të arritur suksesin”, tha ai, duke zbuluar se udhëzimi i trajnerit ishte thjesht: “Shëno golat”.
Sipas Mbappés, Messi dhe Ronaldo i ndryshuan rregullat e lojës dhe lanë një gjurmë të pashlyeshme në historinë e futbollit. Ai e konsideron veten pjesë të gjeneratës që erdhi pas tyre dhe mori frymëzim të madh nga të dy.
Disa talente të rinj i kanë tërhequr vëmendjen. Në mesin e tyre janë Lamine Yamal, Estêvão, Arda Güler, Endrick, Warren Zaïre-Emery dhe Désiré Doué, për të cilët ai këmbëngul se të gjithë kanë atë që nevojitet për të ndërtuar karriera të mëdha.
Për vitet e tij te Paris Saint-Germaini, Mbappé theksoi se mund t’i ishte bashkuar cilitdo klub në Evropë, por qëndroi në Paris sepse ishte i lumtur atje.
Ai gjithashtu refuzoi t’ia zvogëlonte meritat skuadrës franceze pas fitimit të Ligës së Kampionëve dy herë që nga largimi i tij.
Mesazhi i tij përfundimtar për Topin e Artë nuk la shumë hapësirë për dyshime.
“Askush nuk pati një sezon më të mirë se unë vitin e kaluar”, tha ai, në një nga sinjalet më të qarta deri më tani për dëshirën e tij për çmimin më të madh individual të futbollit.
