Qeveria e Kosovës ka reaguar pas shpalljes së aktgjykimit ndaj ish-presidentit Hashim Thaçi dhe të tjerëve në rastin e dytë që lidhet me akuzat për pengim të administrimit të drejtësisë. Në reagim, ekzekutivi ka theksuar se respekton pavarësinë e gjyqësorit dhe vendimet gjyqësore, por ka bërë të ditur se kritikat e tij ndaj Gjykatës Speciale “mbeten të qëndrueshme”.
“Pavarësia e gjyqësorit dhe respektimi i vendimeve gjyqësore janë parime themelore të sundimit të ligjit. Megjithatë, kjo nuk e përjashton të drejtën dhe përgjegjësinë për të ngritur shqetësime lidhur me funksionimin e institucioneve të drejtësisë”, thuhet në reagimin e Qeverisë. Aty theksohen rezervat për transparencën e procedurave, respektimin e të drejtave të palëve dhe garantimin e standardeve të një gjykimi të drejtë.
Qeveria ka vlerësuar se “besimi në drejtësi nuk ndërtohet vetëm mbi vendimet që merren, por edhe mbi mënyrën se si arrihet deri tek ato”. “Prandaj, angazhimi ynë për sundimin e ligjit dhe insistimi për respektimin e plotë të të drejtave dhe garancive procedurale janë pjesë e të njëjtit qëndrim parimor: drejtësia duhet jo vetëm të vihet në vend, por edhe të jetë e drejtë, transparente dhe e besueshme”, thuhet në reagim.












