Shefja e UNMIK-ut, Caroline Ziadeh ka bërë thirrje që të evitohen siç ka thënë ajo “veprimet e njëanshme që mund të rrisin tensionet, të rrezikojnë stabilitetin dhe të minojnë besimin midis komuniteteve”.
Kështu raportohet në një postim të UNMIK-ut në platformën Tëitter.
“Përfaqësuesja speciale Ziadeh përsërit se veprimet e njëanshme që mund të rrisin tensionet, të rrezikojnë stabilitetin dhe të minojnë besimin midis komuniteteve duhet të shmangen. Çështjet e pazgjidhura, përfshirë planet për të rihapur urën e Ibrit të Mitrovicës për automjete, të zgjidhen përmes dialogut të lehtësuar nga BE-ja.” – thuhet në njoftim.
BE dhe KFOR-i
Në një përgjigje për Radio Evropën e Lirë, misioni paqeruajtës i NATO-s në Kosovë ka vlerësuar se në kuadër të mandatit e ka edhe patrullimin rreth urës në fjalë.
“KFOR-i vazhdon të zbatojë mandatin e përcaktuar nga Kombet e Bashkuara për të garantuar një ambient të sigurt për të gjithë banorët e Kosovës, në çdo kohë, në mënyrë të paanshme, përfshirë praninë në urën e Mitrovicës dhe patrullimet në zonën përreth”, ka thënë KFOR-i në një përgjigje për Radio Evropën e Lirë.
Nga ana tjetër, zëdhënësi i BE-së, Peter Stano ka komentuar se Brukseli ka parë mjaft kriza e njëkohësisht, sipas tij, shumë pak zgjidhje dhe hapa që çojnë drejt depërshkllëzimit.
“Hapja e urës në Mitrovicë është në fakt objekt i dy marrëveshjeve në kuadër të dialogut të lehtësuar nga BE: nga viti 2015 dhe viti 2016. Dhe pavarësisht përpjekjeve të Bashkimit Evropian si lehtësues, kjo urë mbetet e mbyllur për qarkullim. Dhe meqenëse kjo është një çështje që i përket dialogut të lehtësuar nga BE-ja, negociatat dhe çdo vendim që lidhet me urën duhet të diskutohet dhe merret në dialog dhe me pjesëmarrjen e përfaqësuesve zyrtarë të të dyja palëve: Kosovës dhe Serbisë. Kjo është shumë e qartë”, deklaroi zëdhënësi i BE-së.
Mirëpo nga Komuna e Mitroviës Veriore u kërkua që të zbatohet vendimi për hapjen e Urës së Ibrit.
Në seancën e sotme të Kuvendit komunal të Mitrovicës së Veriut, është mbështetur vendimi për hapjen e urës së Ibrit.
Ky vendim ishte marrë në prill të vitit të kaluar.
Iniciativën për hapjen e Urës së Ibrit, ishte ndërmarrë nga këshilltarja e Kuvendit komunal, Aida Doli, e cila vjen nga radhët e Vetëvendosjes.
Çka i tha Nacionales, ministri Elber Krasniqi?
“Nuk e di nëse duhet të kemi vlerësim të ligjshmërisë”.
Kështu tha Ministri i Pushtetit Lokal, Elbert Krasniqi në një përgjigje të ngutshme për Nacionale pyetur se “çka u bë me trajtimin e ligjshmërisë” së vendimit të Kuvendit të Komunës së Mitrovicës së Veriut për hapjen e Urës së Ibrit në prill të vitit 2023; vendim ky që ishte marrë prej të parëve kur qeverisjen e mori Lëvizja Vetëvendosje në atë komunë të banuar me shumicë serbe.
