Kanë përfunduar tre ndeshjet e zhvilluara sot të Superligës së Kosovës në kuadër të xhiros së 24’të, ku befasia më e madhe ka ndodhur në Malishevë, pasi skuadra e Malishevës ka triumfuar me rezultat 2-0 kundër kreut të tabelës, Ballkanit.
Ballkani sot si mysafir i Malishevës ka pësuar humbjen e parë nën drejtimin e trajnerit, Ilir Dajës. Me golat e shënuar nga Mërgim Pefqeli dhe Arbër Pira, malishevasit kanë befasuar ‘Xhebrailat’, duke mposhtur kështu një ndër skuadrat më favorite për titull.
Skuadra e drejtuar nga Ilir Daja edhe pas kësaj humbje do të mbetet në vendin e parë me 48 pikë, eventualisht deri nesër kur do të zhvillohet ndeshja Drita-Gjilani, kurse Malisheva përforcon pozitën e shtatë me 29 pikë të grumbulluara gjatë këtij sezoni.
Prishtina ka realizuar fitoren e parë për këtë vit në ndeshjen e zhvilluar sot në Drenas kundër Feronikelit. Kryeqytetasit me golat e shënuar nga Otto John, Besnik Krasniqi dhe Sulley kanë arritur të mposhtin Niklin.
Bardhë e kaltrit tani arrijnë në kuotën e 29 pikëve, kurse Feronikeli është pothuajse skuadra e parë që ka prerë biletën për Ligën e Parë.
Derbi për mbijetesë u luajt sot kundër Ulpianës dhe Dukagjinit duke përfunduar me rezultat të barabartë 1-1. Elton Basriu i Dukagjinit shënoi autogol në minutën e 49′, kurse Arbër Shala barazoj rezultatin në minutën e 68′.
Dukagjini renditet në vendin e tetë me 25 pikë, ndërsa Ulpiana në vendin e parafundit me 23 pikë gjithsej.
Nesër do të zhvillohen edhe dy ndeshje të tjera të Superligës së Kosovës, Drita kundër Gjilanit dhe Llapi do të pres në shtëpi Drenicën.
