Marrëdhëniet e Kosovës me SHBA-në janë përkeqësuar, dialogu strategjik është pezulluar dhe bashkëpunimi tash për tash është ndalur. Arsyeja: Veprimet e Albin Kurtit. Departamenti amerikan i Shtetit tha se ia ka bërë të qartë atij shqetësimet e Washingtonit dhe se ato nuk lidhen “me Serbinë ose aktorë të tjerë të jashtëm”. Ambasada amerikane e ka lënë të hapur derën për “përmirësimin e marrëdhënieve dhe rifillimin e bashkëpunimit”, por kërkon “hapa konkretë” nga kryeministri në detyrë, i cili foli si “aleat i besuar” në një diskutim në New York ku tha se ka “partneritet strategjik në zhvillim ndërmjet Kosovës dhe Shteteve të Bashkuara”.
Shtetet e Bashkuara të Amerikës e kanë quajtur të pasaktë dhe përpjekje për t’i ikur thelbit një arsyetim të Albin Kurtit mbi vendimin e Washingtonit për ta pezulluar për një kohë të pacaktuar dialogun e planifikuar strategjik me Kosovën.
Nga New Yorku, ku po qëndron tash e disa ditë, kryeministri në detyrë e përmendi sundimin e ligjit si arsye, kur në një diskutim me të rinj të dielën iu kërkua shpjegim për pezullimin e dialogut strategjik.
Departamenti amerikan i Shtetit tha të hënën se ia kanë shprehur Kurtit shqetësimet lidhur me veprimet e tij, të cilat u përmendën si arsye kur ambasada amerikane në Prishtinë më 12 shtator njoftoi për vendimin.
“Vendimi për të pezulluar dialogun strategjik bazohet tërësisht në veprimet e qeverisë kujdestare të Kosovës. Çdo sugjerim se kjo lidhet me Serbinë ose aktorë të tjerë të jashtëm është i pasaktë dhe një përpjekje për të ikur (shmangur) nga çështjet thelbësore të përfshira. Ne ia kemi shprehur shqetësimet tona drejtpërdrejt Kryeministrit dhe e kemi bërë qëndrimin e qeverisë së Shteteve të Bashkuara plotësisht të qartë. Shtetet e Bashkuara do të jenë gjithmonë një mik i ngushtë i popullit të Kosovës dhe ne jemi plotësisht të përkushtuar ndaj partneritetit tonë. Megjithatë, Shtetet e Bashkuara i nxisin partnerët tanë të punojnë në mënyrë konstruktive për të siguruar stabilitet dhe siguri”, ka thënë një zëdhënës i DASH-it për Nacionalen.
Ai tha se po kërkojnë “një partner që e kupton nevojën për të shmangur veprimet destabilizuese dhe është i përkushtuar për të çuar përpara stabilitetin rajonal dhe për të mbrojtur të drejtat e të gjithë qytetarëve të Kosovës”.
“Ne do të vazhdojmë të bëjmë vlerësimet për veprimet e qeverisë kujdestare. Nuk kemi asgjë tjetër për të njoftuar në këtë pikë”, ka thënë ky zëdhënës.
Ambasada e SHBA-së në Prishtinë tha të martën se “dera është e hapur për përmirësimin e marrëdhënieve dhe rifillimin e bashkëpunimit”.
“Megjithatë, kjo kërkon hapa konkretë nga kryeministri në detyrë Kurti për të ulur tensionet dhe për të çuar përpara qëllimin tonë të përbashkët për forcimin e paqes dhe stabilitetit si bazë për prosperitet ekonomik të ndërsjellë. Ne do të vazhdojmë të vlerësojmë veprimet e qeverisë në detyrë”, ka thënë një zëdhënës i ambasadës amerikane për Kohën.
Gjatë atij bashkëbisedimi me të rinj në SHBA, Kurti pranoi se ka probleme me partnerin kryesor të vendit që e udhëheq, e lavdëroi veten dhe pati disa vërejtje për Washingtonin. Për pezullimin e dialogut strategjik, tha: “Është për shkak të sundimit të ligjit në veri të Kosovës, i cili rezultoi të ishte kundër strukturave ilegale serbe dhe këtu nuk mund të bëj kompromise. Nuk mund t’ia lë këtë problem brezit tuaj. Mendoj që brezi im është ai që duhet ta përfundojë këtë”.
Në një organizim të Institutit Hudson në New York të hënën, ku u diskutua se si mund të thellohet bashkëpunimi i Kosovës me SHBA-në “në mbrojtje, në zhvillim dhe në sigurimin e sigurisë së qëndrueshme për Ballkanin Perëndimor”, Kurti s’ishte po aq i rreptë.
Në fjalën e tij, Kurti foli për “partneritet strategjik në zhvillim ndërmjet Kosovës dhe Shteteve të Bashkuara”.
Pasi kujtoi se çfarë ka bërë SHBA-ja për Kosovën, ai tha se vendi i vogël ballkanik është “një aleat i besuar”.
“Rreshtimi ynë me Shtetet e Bashkuara dhe NATO-n është parimor dhe pragmatik”, tha Kurti.
Kryeministri në detyrë tha se dallimet e Kosovës me SHBA-në “mund të lindin për çështje taktike”, por shtoi se “për strategjinë dhe vlerat jemi në të njëjtën linjë”.
“Drejtimi është i qartë: Kosova dhe Shtetet e Bashkuara janë të bashkuara në interesa dhe po përparojnë së bashku drejt qëllimeve të përbashkëta”.
Në diskutimin me të rinj, më herët, Kurti tha se disa politikanë dhe diplomatë në SHBA vlerësojnë se Kosova nuk po e ndihmon Washingtonin që ta shkëpusë Serbinë nga Federata Ruse.
“Por, sinqerisht, ky nuk duhet të jetë problemi im”, tha ai.
Në diskutimin tjetër të Hudson, Kurti u shpreh ndryshe.
“Kosova nuk po kërkon të shihet vetëm si përfituese e mbështetjes së NATO-s dhe ShBA-së. Ne jemi një kontribues sigurie, një partner zhvillimi ose një aleat i palëkundur. Në një rajon ku ndikimi rus shfrytëzon përçarjet, Kosova qëndron fort me Shtetet e Bashkuara – në fjalë, në politika dhe në veprime. Pres me padurim diskutimin e sotëm se si mund ta thellojmë më tej këtë bashkëpunim, në mbrojtje, në zhvillim dhe në sigurimin e sigurisë së qëndrueshme për Ballkanin Perëndimor”, tha ai.
Ndryshe, zëdhënësi i Kurtit, Përparim Kryeziu, duke bërë një bilanc për takimet e Kurtit në New York, tha se ai “takoi tre kryeministra shtetesh, gjashtë kongresistë dhe katër senatorë amerikanë”.
Vetë Kurti, pas takimeve tjera, bëri një numërim të ri, ku tregoi se senatorët dhe kongresitetët ishin në fokus.
“Diskutuam me dhjetë kongresistë dhe senatorë amerikanë, prej tyre gjashtë nga radhët e demokratëve dhe katër nga Partia Republikane”, shkroi ai.
