Rusia mund të sulmojë një vend të NATO-s brenda katër viteve, sipas vlerësimeve të inteligjencës perëndimore, paralajmëroi të premten kryeministri i Mbretërisë së Bashkuar, Keir Starmer.

Ai i bëri këto komente ndërsa premtoi se qeveria e tij do të publikojë një plan investimesh në mbrojtje të vonuar prej kohësh përpara samitit të NATO-s muajin e ardhshëm.

“Është një vlerësim i inteligjencës sonë dhe i vendeve të tjera në NATO se mund të ketë një sulm nga Rusia ndaj NATO-s që në vitin 2030”, tha Starmer, shkruan Euronews.com.

“Pra, mund ta shihni urgjencën dhe përparësinë që po i japim kësaj tani”, shtoi ai gjatë një vizite në një prodhues dronësh në Anglinë jugperëndimore.

Kjo pasqyron afate kohore të ngjashme të shprehura nga udhëheqës të tjerë evropianë dhe shefi i NATO-s, Mark Rutte, i cili paralajmëroi në dhjetor se Rusia “mund të jetë gati të përdorë forcën ushtarake kundër NATO-s brenda pesë vjetësh”.

Starmer është zotuar të rrisë shpenzimet e mbrojtjes në 2.5% të PBB-së nga viti i ardhshëm, duke u rritur në 3% në parlamentin e ardhshëm.

Një plan 10-vjeçar për investime në mbrojtje, pas një shqyrtimi të aftësive mbrojtëse të Mbretërisë së Bashkuar, ishte menduar të publikohej në fund të vitit të kaluar, por ende nuk është hartuar.

Starmer njoftoi se do të publikohej para samitit të NATO-s në Turqi, që fillon më 7 korrik.