Vinicius Junior po kalon një periudhë të vështirë te Real Madridi.
Sulmuesi brazilian e ka pranuar se nuk po luan në nivelin e tij më të mirë, ndërsa ka folur hapur për zemërimin pas zëvendësimit në ndeshjen ndaj Romës dhe për reagimet e tifozëve në “Santiago Bernabeu”.
Përmbysja e Real Madridit ndaj Romës, me rezultat 4-3, u shoqërua edhe me diskutime rreth Viniciusit.
Braziliani e nisi ndeshjen si titullar, por u zëvendësua nga José Mourinho kur Roma kryesonte 3-1.
Pak minuta pas largimit të tij nga fusha, madrilenët i realizuan tre gola dhe e kompletuan një përmbysje të jashtëzakonshme.
Zëvendësimi shkaktoi reagime, sidomos për shkak të pakënaqësisë së dukshme të sulmuesit.
Pak më herët, Mourinho e kishte qortuar për humbjen e topit në aksionin që çoi te goli i dytë i Donyell Malenit.
Megjithatë, pas ndeshjes, Vinicius zgjodhi të ishte kritik ndaj vetes, shkruan “Tuttomercatoweb”, përcjell “Gazeta Express”.
“Është normale që u zemërova pas zëvendësimit, sepse gjithmonë dua të jem në maksimum dhe ta ndihmoj skuadrën. Jam i zemëruar me veten, sepse nuk po luaj në nivelin tim më të mirë. Por, në fund, Vini gjithmonë rikthehet dhe nuk kam asnjë dyshim se do të rikthehem”, deklaroi braziliani.
Vinicius i vlerëson Endrickun dhe Carlos Espín
Sulmuesi i Real Madridit e pranoi se zëvendësimet patën ndikim vendimtar në përmbysjen ndaj Romës, duke e vlerësuar veçanërisht paraqitjen e Endrickut dhe Carlos Espí.
“Zëvendësimet e ndryshuan ndeshjen. Endricku e ndryshoi dinamikën dhe ishte më i miri, ndërsa Carlos hyri në fushë dhe shënoi”, u shpreh ai.
Sezoni aktual nuk ka nisur në mënyrën më të mirë për fanellën me numrin shtatë të Real Madridit.
Në dhjetë ndeshje të zhvilluara deri më tani, Vinicius ka realizuar vetëm një gol dhe ka regjistruar tri asistime.
Dënimi dhe vërshëllimat e tifozëve
Një tjetër faktor që ndikoi te gjendja e tij emocionale ishte lajmi për pezullimin me katër ndeshje në La Liga, të cilin e mori vetëm pak orë para përballjes evropiane me Romën.
“Erdhi në momentin e gabuar. Mund të ma kishin komunikuar më herët, jo kur mbërrita në stadium”, tha Vinicius.
Braziliani foli edhe për vërshëllimat që i ka marrë nga tifozët e Real Madridit në “Santiago Bernabeu”, duke e pranuar se ato nuk e ndihmojnë, por se e kupton pakënaqësinë e tyre.
“Vërshëllimat nuk më ndihmojnë, por e kuptoj që tifozët i paguajnë biletën. Ne luajmë më mirë kur ata janë në anën tonë. Kur erdha këtu, isha shumë i ri dhe shumë njerëz talleshin me mua, por i kam shënuar më shumë se 100 gola me këtë fanellë”, përfundoi sulmuesi brazilian.
Vinicius beson se mund ta kalojë këtë periudhë dhe të rikthehet në formën e tij më të mirë, ndërsa Real Madridi shpreson që ylli brazilian të rifitojë sa më shpejt ndikimin vendimtar në lojën e skuadrës.
