Rasti i Granit Xhakës me certifikatën e falsifikuar të vaksinimit kundër COVID-19 po merr një tjetër dimension, pasi është raportuar se dokumenti mund të jetë përdorur edhe gjatë udhëtimit të Arsenalit në Shtetet e Bashkuara në vitin 2022.
Sipas avokatit Fabian Teichmann, ky element mund të jetë pjesa më e rëndë juridike e çështjes. Në atë periudhë, udhëtarët e huaj që hynin në SHBA duhej të paraqisnin dëshmi të vlefshme vaksinimi.
“Në letër, udhëtimi në SHBA është elementi më i rëndë i gjithë rastit”, deklaron Teichmann, duke theksuar se përdorimi i një dokumenti të rremë mund të nënkuptojë anashkalimin e një kushti të hyrjes në një shtet të huaj.
Sipas tij, deklaratat e rreme ndaj autoriteteve amerikane mund të dënohen deri në pesë vjet burg, megjithëse një ndjekje penale ndaj Xhakës në SHBA konsiderohet “jashtëzakonisht e pamundur”. Në rast të një procedure, avokati e sheh më realiste një dënim me kusht dhe gjobë.
Megjithatë, mbetet një pikë e paqartë: dokumenti që është bërë publik pretendohet se shënon dozën e dytë të vaksinës më 8 nëntor 2022, disa muaj pas udhëtimit të Arsenalit në SHBA. Çfarë dokumenti është paraqitur konkretisht gjatë udhëtimit të korrikut 2022, mbetet për t’u sqaruar.
Një tjetër pasojë e mundshme lidhet me udhëtimet e ardhshme të Xhakës në SHBA. Sipas Teichmann, përdorimi i një dokumenti të rremë mund të ndikojë në të drejtën për të hyrë pa vizë.
“ESTA për të ndoshta ka përfunduar”, thotë avokati, duke shtuar se në të ardhmen Xhaka mund të ketë nevojë për vizë për të udhëtuar drejt Shteteve të Bashkuara.
Në Zvicër, ndërkohë, hetimet vazhdojnë. Përdorimi i një dokumenti të falsifikuar mund të ketë rëndësi edhe në procedurën vendase, ndërsa udhëtimi në SHBA mund të jetë pjesë e provave që autoritetet duhet të shqyrtojnë.
Xhaka ka pranuar publikisht se ka blerë një certifikatë të falsifikuar dhe ka deklaruar se do të bashkëpunojë me autoritetet. Megjithatë, ai vazhdon të konsiderohet person nën hetim dhe jo i dënuar.
Nëse autoritetet amerikane do të ndërmerrnin një procedurë, Xhaka nuk do të mund të ekstradohej drejtpërdrejt nga Zvicra vetëm për këtë çështje. Këshilla e Teichmann për një udhëtim të ardhshëm në SHBA është e qartë:
“Së pari sqaroje çështjen, pastaj fluturo.”./Indeksonline/
