Një tender i shpallur nga Komuna e Mitrovicës më 27 maj në vlerë prej 3 milionë euro për ndërtimin e rrugëve në fshatrat Kaqandoll dhe Maxherë, po dyshohet se është parapërgatitur përmes kritereve favorizuese që t’i jepet një grupi të operatorëve. Në redaksinë e Veriu.info kanë ardhur denoncime nga kompani kosovare, të cilat pretendojnë se përmes kritereve favorizuese Komuna e Mitrovicës ka parapërgatitur nxjerrjen e fituesit qysh në momentin e shpalljes së tenderit.
Nga analizimi i dosjes së tenderit dhe konsultimit me ekspertë të fushës, Veriu.info ka gjetur dyshime të bazuara se kriteret e tenderit janë të parapërgatitura dhe favorizuese për një grup operatorësh dhe diskriminuese në thelb për operatorë të tjerë, pasi që disa nga makineritë e kërkuara nuk kanë të bëjnë asgjë me punët që planifikohen të kryhen.
Se kriteret e tenderit për asfaltimin e rrugëve në Kaqandoll dhe Maxherë janë jashtë çdo logjike, e dëshmon fakti se kriter minimal për t’u kualifikuar për tender është kërkuar që kompania aplikuese të ketë 10 punëtorë, ndërsa numri i makinerive të kërkuara është 69. Nëse kompania nuk do të ketë asnjë punëtor fizik, por vetëm shoferë, këta 10 të punësuar mund të mbulojnë vetëm 15% të makinerive.
Dyshimi tjetër i bazuar për manipulim me kritere të tenderit, sipas denoncimeve të pranuara nga Veriu.info, ka të bëjë me numrin e makinerive dhe specifikat që janë kërkuar për to.
Në Aneksin 7 të Dosjes së Tenderit të Lista e Pajisjeve kërkohet numër 20 kërkohet “Makinë për gërryerjen dhe bluarje të asfaltit e pajisur me GPS”. Rrugët që po planifikohen të shtrohen nuk janë të asfaltuara paraprakisht dhe kërkesa që kompania që konkuron duhet të ketë makineri për gërryerje është e panevojshme, palogjikshme dhe diskriminuese. Më saktësisht është favorizuese për ndonjë kompani që posedon pajisje unike të tillë, e cila duket se është futur sa për t’i eliminuar operatorët e tjerë.
Autoritetit Kontraktues (Komunës së Mitrovicës) nuk i ka mjaftuar të vendos një makinë të tillë, por në tender ka kërkuar që operatori që aplikon t’i ketë dy makineri për gërryerje të asfaltit inekzistent. Për më tepër, ka kërkuar që këto makineri të kenë edhe GPS, i cili zakonisht vendoset në makineri nga pronarët e tyre me qëllim që të verifikohet vendndodhja në rast vjedhjes, por që në këtë rast komuna duke u ‘preokupuar’ për sigurinë e pajisjeve të kompanive private, ka vendosur të favorizojë kompani të caktuara.
Pajisja e kërkuar me numër 18 është “Cilindër me dhëmbëza, vibrues dhe teh per shtrimin e rrugëve me peshë min. 19 ton”. Vetë specifikimi 19 ton, jo 20 apo 15, ka ngritur dyshime se i njëjti kriter është vendosur për qëllime favorizuese.
Në pikën 13 Komuna e Mitrovicës ka vendosur si kriter që operatori ekonomik për t’u kualifikuar si i përgjegjshëm, duhet të ketë “dy (2) Buldozer me thikë lëvizëse dhe kthyese në dy krahet me GPS dhe kamera me peshë minimale 29 tonë”. Ekspertë të fushatës për Veriu.info kanë thënë se buldozer të tillë kërkohen për autostrada, e jo për rrugë rreth 4 metra të gjera. Edhe këtu vërehet tendencë diskriminuese, pasi prapë kërkohen që makineria të jetë me GPS dhe Kamerë, sikur të ketë komuna ndonjë databazë nga e cila i përcjell online punimet, e të cilën nuk ka. Në dosje të tenderit nuk e ka arsyetuar as pse i kërkon dy (2) e jo një (1) buldozer të tillë.
Në pikën 15 Komuna e Mitrovicës ka kërkuar që kompania aplikuese në tender të ketë “Cilindër me teledirixhues, me peshe max 2 ton.” Edhe ky kriter dyshohet se është diskriminues dhe manipulues, pasi që ekspertë të fushës i kanë thënë Veriu.info se cilindra të tillë me teledirigjim përdoren në hapësira të rrezikshme, gropa të thella që rrezikohen nga shembjet, tunele ose afër mureve ku njeriu rrezikohet fizikisht.
Në pikën 32 është kërkuar që kompania aplikuese duhet të ketë “Riper special me vibrim (çekiq) min. 3.5 ton”. Veriu.info mëson se gjatë ndërtimit të rrugëve lokale thyerja e pjesëve të forta dhe shkëmbinjve që hasen mund të kryhet me çekiq standard me hidraulikë të montuar në eskavator. Por vendosja e kriterit për riper special me vibrim minimum në peshë prej 3.5 tonë, është bërë me qëllim të eliminimit të konkurrencës.
Për t’i numëruar një nga një, numri i kritereve diskriminuese për të eliminuar konkurencën në këtë tender është i madh, ku në shumë prej pajisjeve kërkohen jashtë çdo logjike GPS e Kamera, të cilat nëse do të kërkoheshin për secilën prej makinerive në mënyrë uniforme edhe do të mund të arsyetoheshin.
Në denoncimet e ardhura në redaksinë e Veriu.info, pretendohet se këto kritere janë vendosur për të favorizuar grupin e operatorëve ekonomik Dio Bes Sh.P.K. dhe Eurokos Holding, të cilët muajin e kaluar ishin shpallur fitues të një tenderi tjetër me vlerë rreth 3 milionë euro, për të cilin kishte pasur ankesa nga operatorët tjerë për manipulime në vlerësim nga Komisioni Vlerësues i Komunës së Mitrovicës.
Në lidhje me denoncimet për favorizim nga Komuna e Mitrovicës të kompanive Dio Bes Sh.P.K. dhe Eurokos Holding Sh.P.K., Veriu.info ka tentuar të marrë qëndrimin e tyre në lidhje me akuzat për manipulim të kritereve të tenderit për t’i favorizuar ato, por që anjëra prej kompanive nuk ka kthyer përgjigje në pyetjet e dërguara me e-mail.
Veriu.info ka kontaktuar edhe Komunën e Mitrovicës në lidhje me këto kritere diskriminuese të vendosura për tenderin në vlerë prej 3 milionë euro, ku përgjigje kemi pranuar vetëm nga zyra e prokurimit, por jo edhe nga njësia kërkuese, që zakonisht për ndërtim të rrugëve është Drejtoria për Shërbime Publike.
Në përgjigjen e kthyer nga zyrtari përgjegjës i prokurimit, Kushtim Mehaj, ai mohon se tenderi është parapërgatitur për të favorizuar ndonjë operator, përderisa nuk ka ofruar përgjigje se pse janë vendosur si kërkesë si pajisje që si të tillë nuk janë të destinuara për asfaltimin e rrugëve lokale.
“Pas shqyrtimit të tyre, vlerësojmë se një pjesë e konsiderueshme e pyetjeve të parashtruara nuk përbëjnë kërkesa për informim publik, qasje në dokumente apo sqarime objektive mbi procedurën e prokurimit, por përmbajnë aludime, supozime dhe pretendime të formuluara paraprakisht lidhur me qëllimet e Autoritetit Kontraktues dhe të zyrtarëve të përfshirë në këtë procedurë. Në pothuajse secilën pyetje parashtrohen pretendime se kriteret teknike, pajisjet e kërkuara apo kushtet e tenderit janë vendosur me qëllim të eliminimit të konkurrencës dhe favorizimit të operatorëve të caktuar ekonomikë. Këto janë pretendime serioze të cilat nuk mbështeten në asnjë fakt, dokument apo vendim zyrtar të identifikuar në pyetjet tuaja, por paraqiten si konkluzione të nxjerra paraprakisht nga vetë parashtruesi i pyetjeve. Autoriteti Kontraktues nuk mund të përgjigjet ndaj motiveve, qëllimeve apo skenarëve hipotetikë të atribuuar nga palë të treta. Gjithashtu, nuk mund të komentojë pretendime të cilat nuk bazohen në prova konkrete, por në interpretime subjektive të dokumentacionit të tenderit. Për rrjedhojë, Autoriteti Kontraktues nuk sheh bazë për t’iu përgjigjur individualisht secilës pyetje që është ndërtuar mbi premisën se ekziston favorizim, eliminim i konkurrencës apo qëllim i caktuar për përfitimin e operatorëve ekonomikë specifikë, pasi këto nuk janë fakte të provuara, por pretendime dhe interpretime subjektive të përfshira në vetë formulimin e pyetjeve”, thuhet ndër të tjera në përgjigjen e zyrtarit përgjegjës të prokurimit të Komunës së Mitrovicës, Kushtim Mehaj, i cili edhe pse ka kthyer përgjigje të gjatë, nuk është përgjigjur pse janë caktuar kriteret specifike për të cilat ka denoncime se janë vendosur për ta favorizuar një grup operatorësh.
Veriu.info muajin e kaluar kishte raportuar se Komuna e Mitrovicës kishte shpallur fitues grupin e operatorëve Dios Bes dhe Eurokos Holding për tenderin tjetër 3 milionësh për asfaltimin e rrugëve në Bajgorë, Rashan, Tërstenë, Kutllovc e Vllahi, edhe pse anëtari profesional i Komisionit Vlerësues, Rexhep Hajdari kishte deklaruar se këto kompani nuk i plotësonin kriteret dhe kishte kërkuar të eliminoheshin
Në lidhje me këtë tenderë Veriu.info kishte raportuar për konflikt të mundshëm interesi, pasi që gruaja e Vedat Poterqoit – anëtarit të Panelit për shqyrtimin e ankesave në Organin Shqyrtues të Prokurimit, i cili kishte aprovuar ankesën e fituesve të tenderit, është vajza e axhës së Ylber Shamollit – pronarit të Eurokos Holding.
Ndërsa, pronar i kompanisë Dio Bes Sh.P.K. është Xhelal Shabani, vëllai i pronarit të Bageri Company, Bujar Shabanit, te i cili kishte punuar ish ministri i Infrastrukturës nga VV, Hysen Durmishi.
