Kryetari i Aleancës për Ardhmërinë e Kosovës, Ramush Haradinaj, ka thënë se mosparaqitja e kryeministrit Albin Kurti në Prokurorinë Speciale është “dëshmi se kryeministri nuk është në anën e ligjit por në anën e të akuzuarve për korrupsion dhe vjedhje”.
Kreu i AAK-së ka akuzuar Kurtin për “mbrojtje të krimit dhe korrupsionit”, duke thënë se qëndrimi i tij tregon se ai është në anën e të akuzuarve dhe nuk i respekton thirrjet e Prokurorisë për të dhënë shpjegime.
“Lufta kundër korrupsionit ose hajnisë nuk është e lehtë. Ka qenë e vështirë gjithmonë, ka pasur shqetësime për korrupsion edhe në të kaluarën në të gjitha qeveritë edhe në qeverisjen time. Mirëpo, çdoherë zyrtarët shtetërorë, udhëheqësit e shtetit, kanë qenë me ligjin dhe në anën e prokurorëve”, tha Haradinaj.Ai e quan veprimin e Kurti si një mbështetje “për korrupsionin dhe krimin”, duke theksuar se kjo sjellje është një veprim i gabuar dhe i dëmshëm për shtetin.
“Është hera e parë në historinë e Kosovës, që kryeministri nuk është me ligjin e as me prokurorin, por është me hajnin, me të akuzuarit për hajni edhe kjo sjellja e tij e mosshkuarjes në intervistim është inkurajim për korrupsionin, për krimin e hajninë. Është veprim i gabuar dhe i dëmshëm për shtetin ligjor edhe na dëmton shumë planin ndërkombëtarë, sepse vlerësimi për shtetin ligjor të Kosovës dobësohet kur kryeministri nuk e respekton ftesën e prokurorit”, deklaroi Haradinaj.Kryeministri i Kosovës, Albin Kurti, është ftuar nga Prokuroria Speciale për intervistim në cilësinë e dëshmitarit. Kurti nuk është paraqitur në datat e caktuara nga prokuroria, ndërsa ka ftuar prokurorët që ta intervistojnë në zyrën e tij.
Haradinaj sugjeron se Kurti mund të jetë i përfshirë “në skema të korrupsionit”, duke e quajtur atë “shefi i hajnave” që ka mundësuar vjedhjen dhe po i mbron ata që janë të akuzuar për këtë veprim.“Ai ka pasur deklarime në Parlament kundër Prokurorisë. Sjellja e tij e sotme është në anën e të akuzuarve pra ai po mbron krimin e jo ligjin”, tha Haradinaj./ekonomiaonline/
