Veriu.info kishte raportuar muajin e kaluar se si futbollistët e FC Vushtrria kishin mbetur pa paga për disa muaj, si pasojë e mos-menaxhimit të duhur të klubit.
Ndaj shkrimeve të Veriu.info kishte pasur reagime nga eksponentë të afërt ne drejtuesit e klubit, të cilët shkrimet i kishin quajtur tendencioze. Në përfundim të edicionit 2024/25 FC Vushtrria kishte dështuar të futet në Super Ligën e Kosovës në futboll, edhe përkundër që vitin e kaluar kishin arritur të siguronin si sponsor kryesor pronarin e INTEREX, Shaip Mikullovci.
Një sinjalizues i Veriu.info brenda FC Vushtrria ka dërguar në redaksi qarkullimin bankar të klubit nga qershori 2024 deri maj 2025, duke pretenduar se ka transaksione financiare të dyshimta, madje sipas tij, janë transaksione për shërbime fiktive.
Si pagesat më të dyshimta, ky sinjalizues i Veriu.info i ka përmendur dy sosh të bëra në drejtim të kompanisë “Inter Steel” Sh.P.K., e cila si aktivitet kryesor në Agjencinë e Regjistrimit të Bizneseve ka “Tregtia me shumicë e drurit, materialeve të ndërtimit dhe pajisjeve hidrosanitare”.
Ndërsa, në faqen e “Inter Steel” Sh.P.K. në Facebook, kjo kompani promovon kryesisht kryrje të punëve që kanë të bëjnë me: Profile metali, llamarinë te zinkuar e lëndë të parë të çelikut.
Pra, sipas sinjalizuesit, aktiviteti i “Inter Steel” Sh.P.K. në ARBK e as në faqen e saj në Facebook, nuk korrespodojnë me shërbimet që merr një klub futbolli.
Fjala është për dy transaksione financiar të kryera nga FC Vushtrria në drejtim të kompanisë “Inter Steel” Sh.P.K.: 100 520 euro më datë 07.10.2024 sipas profaturës 109/2024 dhe 30 160 euro më datë 16.01.2025 sipas profaturës 5/2024.
Është interesant fakti se pagesa e parë është bërë më 7 tetor 2024, pikërisht në ditën kur kompania “PROEX” Sh.P.K. i kishte transferuar klubit 350 mijë në emër të sponsorizimit.
Transaksioni i dytë i FC Vushtrria në drejtim të “Inter Steel” Sh.P.K. është bërë në vitin 2025 në bazë të një profature që mbanë vitin 2024 dhe është me numër rendor para profaturës së paguar në muajin tetor.
“PROEX” Sh.P.K. ka në pronësi rrjetin e super markteve “INTEREX”, ndërsa 100% të aksioneve të “PROEX” Sh.P.K. i zotëron kompania “CDI -Kosovo L.L.C”. Sponsori kryesor i FC Vushtrria, Shaip Mikullovci, i zotëron 93% të aksioneve në “CDI -Kosovo L.L.C”.
Duke qenë se është vlerë jashtëzakonisht e madhe, sa rrogat e disa muajve për futbollistë, Veriu.info ka tentuar të kontaktoj më përfaqësues të klubit dhe kompanisë, por që asnjëra palë nuk është përgjigjur.
Veriu.info ka dërguar pyetje në Whatsaap në numrin e pronarit të “Inter Steel” Sh.P.K., Bujar Reka, por ai nuk ka kthyer përgjigje.
Po ashtu pyetje për këto transaksione financiare i kemi dërguar edhe kryetarit të FC Vushtrria, Shemsi Rrahimi, por që as ky nuk është përgjigjur, sikurse që nuk kemi marr përgjigje as në pyetjet e dërguara në e-mail të FC Vushtrria.
(Veriu.info sapo të marr një përgjigje nga klubi ose kompania do ta publikoj.)
