Kuvendi Komunal i Mitrovicës sot mbajti mbledhjen e rregullt, në të cilën korrigjoi gabimin e bërë në mbledhjen e mbajtur në fund të muajit prill, ku asokohe ishte konstatuar se nuk ishte miratuar pika e rendit të ditës për Hartën Zonale, por që Veriu.info kishte raportuar ekskluzivisht se konstatimi ishte bërë gabim dhe se faktikisht ajo pikë e rendit të ditës ishte miratuar.
Fillimisht Kryesuesja e Kuvendit Komunal të Mitrovicës, Vesa Broja, i ka ftuar përfaqësuesit e partive në një takim konsultativ.
“Secili para vetes e keni një dokument që është komunikimi me Ministrinë e Administrimit të Pushtetit Lokal, sa i përket pikës së Hartave Zonale të datës 28.04.2025. Për me marrë një vendim për këtë çështje unë i ftoj përfaqësuesit e partive politike për një konsult”, ka thënë Broja.
Pas konsultimit me përfaqësuesit e partive politike, Broja është kthyer për ta vazhduar seancën, por pa asnjë paralajmërim apo vërejtje, seancën e kanë lëshuar asamblistët e VV-së.
Më pas Kryesuesja Vesa Broja ka kërkuar që të ndrrohet procesverbali i mbledhjes së prillit dhe në procesverbal të konstatohet se në mbledhjen e 39-të është miratuar “Propozim-vendimi për miratimin e Hartës Zonale të Komunës së Mitrovicës së Jugut për periudhën 2024-2032”.
Asamblistët e pranishëm nga PDK-LDK-AKR-PD e votuan më shumicë votash procesverbalin e ndryshuar me të cilin konstatohet se në seancën e prillit është miratuar Harta Zonale.
Saga dy mujore e (mos) miratimit të Hartës Zonale dhe impakti i Veriu.info?
Në seancën e muajit prill për këtë pikë të rendit të ditës kishin votuar për 17 asamblistë, ndërsa 16 të tjerë pranishëm nuk kishin marrë pjesë në votim, duke mos votuar as për, as kundër e as abstenim. Duke qenë se Kuvendi Komunal i Mitrovicës i ka 35 anëtarë, kryesuesja Broja kishte konstatuar se “Propozim-vendimi për miratimin e Hartës Zonale të Komunës së Mitrovicës së Jugut për periudhën 2024-2032” nuk është miratuar, konstatim që nuk ishte kundërshtuar nga asnjë asamblistë.
Disa ditë më pas Veriu.info kishte publikuar një artikull ekskluziv, ku me dokumente të MAPL-së për raste të ngjashme, kishte raportuar se ajo pikë e rendit të ditës ishte miratuar.
Mirëpo, për shkak se Kryesuesja e Kuvendit Komunal dhe në përgjithësi asamblistët komunal nuk lëviznin tutje, Veriu.info më 04.06.2025 i ishte drejtuar Sekretarit të MAPL-së, Jeton Qela, me kërkesë zyrtare për shqyrtimin urgjent të ligjshmërisë së vendimit të Kuvendit Komunal të Mitrovicës dhe të konstatohet se kjo pikë e rendit të ditës është miratuar.
Kjo ministri me datë 18.06.2025 ka kthyer përgjigje në redaksinë e Veriu.info, duke na njoftuar se: “MAPL, përmes shkresës Nr. 020-262/7, të datës 17.06.2025, dërguar komunës së Mitrovicës së Jugut ka ofruar sqarimet e nevojshme lidhur me procesin e votimit për Hartën Zonale të Komunës së Mitrovicës së Jugut, presim nga komuna e Mitrovicës së Jugut të ndërmarrin veprime konform legjislacionit në fuqi.”
Këtë shkresë të MAPL-së të përcjellur në Komunën e Mitrovicës më 17.06.2025, Kryesuesja e Kuvendit Komunal, Vesa Broja, sot e ka prezantuar në seancë dhe në bazë të saj ka kërkuar që të ndryshohet procesverbali dhe të konstatohet se Harta Zonale është miratuar në seancën e prillit, ashtu siç në fakt kishte raportuar Veriu.info në fillim të muajit maj.
Prapaskenat e VV-së për Hartën Zonale?
Veriu.info kishte raportuar me 27 prill, një ditë para seancës, se VV është në dilemë të madhe të votoj apo mos e votoj Hartën Zonale. Për këtë ishte mbajtur një mbledhje e Kryesisë dhe Grupit të Asamblistëve e udhëhequr nga kryetari i VV-së në Mitrovicë, Armend Muja, ku ishte vendosur që VV nuk e përkrah miratimin e Hartës Zonale dhe ashtu kishin vepruar të nesërmen edhe në seancën e Kuvendit Komunal.
Hipokrizia e VV-së për (mos) miratimin e Hartës Zonale në Mitrovicë! Çka do të vendosin sonte?
Mirëpo, hipokrizia e VV-së këtu qendron në faktin se ky dokument strategjik për zhvillimin e Mitrovicës ka nisur të hartohet në qeverisjen e kaluar komunale, e cila asokohe udhëheqej nga Lëvizja Vetëvendosje. Veriu.info ka siguruar vendimin e Komuna e Mitrovicës që e shpall fituese kompaninë “Instituti i Shkencës dhe i Teknologjisë INSI Sh.P.K.” për kontratën me titull “Hartimi i projekteve, planeve hapësinore PZhK dhe Hartave Zonale Komunale”. Pasi që LVV kishte humbur zgjedhjet lokale në Mitrovicë në tetor të atij viti, projektin e Hartave Zonale në bazë të kësaj kontrate e kishte vazhduar qeverisja aktuale që drejtohet nga PDK, e cila e kishte prezantuar në Kuvend Komunal “Propozim vendim për miratimin e Hartës Zonale të Komunës së Mitrovicës së Jugut (HZK) 2024-2032”.
Në seancën e prillit asamblistët e VV-së nuk votuan për miratimin e kësaj harte, por pastaj kjo çështje është dërguar për shqyrtim të ligjshmërisë në MAPL nga Veriu.info dhe pikërisht kjo ministri e Qeverisë Kurti, me në krye ministrin Elbert Krasniqi dhe Sekretarin e Përgjithshëm, Jeton Qela, kishte udhëzuar Komunën e Mitrovicës që të konstatohet se Harta Zonale është miratuar.
Ndryshe, Sekretari i Përhershëm i MAPL-së, Jeton Qela, të cilit Veriu.info ia kishte dërguar kërkesën për shqyrtim të ligjshmërisë, është mik i afërt me ministrin Faton Peci që është edhe kandidat për kryetar të Mitrovicës i mbështetur nga VV, parti kjo që ishte kundër Hartës Zonale.
Pasi që MAPL kishte konstatuar se pika e Hartës Zonale është miratuar në prill dhe duke u gjendur në ‘pat’ pozicion, asamblistët e VV-së sot lëshuan seancën, por duke mos thënë se seancë asnjë fjalë. Kjo pasi që nëse do të votonin kundër, do të nënkuptonte se po e kundërshtojnë MAPL-në, ndërsa nëse do të votonin për do të mund të interpretohej se po e mbështesin PDK-në.
