(Artikull i përditësuar 05.07.2025)Në bazë të deklarimit të Ministrisë së Shëndetësisë, Veriu.info kishte raportuar me 3 korrik për mbylljen e poliklinikës “Euromed Group” Sh.P.K. për shkak të operimit pa licencë.
Mirëpo, në një deklarim të, Leart Jakupi, pronar i “Euromed” për Veriu.info, ai e ka mohuar kategorikisht mbylljen e poliklinikës së tij, duke thënë se eështë mbyllur vetëm laboratori, për të cilën mbyllje thotë se kishte bërë kërkesë para disa muajsh.
Jakupi ka ofruar edhe procesverbalin e inspektimit të Inspektorëve Shëndetësor, ku shihet se inspektimi është kryer për funksionim të laboratorit pa licencë, ku në fund të tij shkruan se është bërë vetëm mbyllja e përkohëshme e veprimtarisë së laboratorit.
Leart Jakupi thotë se në përputhje me aktet ligjore në fuqi, ka lidhur marrëveshje me spitalin “SIADO” për të shfrytëzuar laboratorin e tij për analiza, për çka edhe ka ofruar dokumentin e nënshkruar dhe aprovuar nga Bordi për Licencim të Institucioneve të Kujdesit Privat Shëndetësor.
Reagim i “EUROMED”:
—-
Javën e kaluar inspektorati shëndetësor ka mbyllur 8 institucione shëndetësore private të cilat po operonin pa licencë.
Ministri në detyrë i Ministrisë së Shëndetësisë, Arben Vitia, në një njoftim kishte thënë se inspektorati shëndetësor po përkujdeset të garantoj respektim të ligjit dhe standardeve të shërbimeve shëndetësore.
Veriu.info ka kërkuar qasje në dokumente publike në Ministrisë e Shëndetësisë në vendimet për mbylljen e këtyre institucioneve shëndetësore private, por që në një përgjigja nga ministria kemi pranuar vetëm listën me emrat e institucioneve që janë mbyllur, pasi që janë arsyetur se vendimet dhe raportet e inspektimeve janë në fazën e përgatitjes nga inspektorët e rastit.
Në përgjigjen e dhënë nga Ministria e Shëndetësisë për Veriu.info, shihet se në mesin e institucioneve që janë mbyllur është edhe poliklinika “Euromed Group” Sh.P.K. me pronar Leart Jakupi.
Data e inspektimit në këtë klinikë nga inspektorati shëndetësor është 24.06.2025, me ç’rast është marrë vendim për mbylljen e saj.
