Kryetari i Komunës së Vushtrrisë, Ferit Idrizi, ka uruar mirëseardhje për të gjithë bashkatdhetarët që kanë ardhur për pushime në vendlindje, duke theksuar përkushtimin institucional për t’ua lehtësuar qëndrimin gjatë sezonit veror.
Në këtë kuadër, Idrizi ka njoftuar se është marrë vendim që Drejtoria për Administratë të Përgjithshme të ofrojë shërbime edhe të shtunave, nga data 5 korrik deri më 31 gusht, në orar nga 09:00 deri në 14:00. Po ashtu, gjatë ditëve të zakonshme të punës, shërbimet do të ofrohen edhe gjatë orarit të pauzës, në mënyrë që qytetarët të mos humbasin kohë duke pritur.
Si masë tjetër lehtësuese, komuna ka lejuar shfrytëzimin pa pagesë të oborreve të disa shkollave në qytet për parkimin e veturave, gjatë muajve korrik dhe gusht.
Kryetari Idrizi ka ritheksuar se institucionet lokale janë në shërbim të qytetarëve dhe mërgimtarëve, duke u uruar të gjithëve: “Mirësevini në shtëpi!”
