Vdekja e dy punëtorëvë në Gjakovë: Gjobat e vjetra si alibi për vdekjet e reja – si tentoi Inspektorati i Punës të shpëtojë nga përgjegjësia (Dokument)

Më 21 korrik dy punëtorë të ndërtimtarisë Hazir Jakupaj dhe Daut Bajraktari, kanë humbur jetën pasi ranë nga një objekt në ndërtim në Gjakovë. Xheladin Pozhegu në cilësinë e investitorit e Albert Margegaj në cilësinë e punëkryerësit, dyshohet nuk kanë ofruar siguri në vendin e punës duke mos instaluar pajisjet mbrojtëse dhe në mungesë të tyre, është shkaktuar dhe vdekja e dy viktimave.

Pas kësaj ngjarje tragjike drejtori i Inspektoratit të Punës, Rizah Plakolli kishte lëshuar një komunikatë ku thoshte se subjekti ku ndodhi aksidenti ka qenë më herët dy herë i gjobitur nga Inspektorati i Punës për shkelje të përsëritura në këtë fushë. Fjala ishte për kompaninë “Mai Group” më pronar Albert Margegaj.

Mirëpo, kjo faktikisht është një kamuflazh që ka bërë Inspektorati i Punës me të dhëna që nuk lidhen aspak me vendpunishten ku kanë humbur jetën punëtorët e as me vitin 2025, në të cilën investitor është kompania N.T.Sh. “Shefqet” Sh.P.K. me pronar Xheladin Pozhegu.

Përmes kërkesës për qasje në dokumente publike, Veriu.info ka siguruar nga Inspektorati i Punës raportet e inspektimit dhe gjobat ndaj “Mai Group”, të cilave u referohet drejtori i Inspektoratit të Punës në reagim.

Sipas dokumenteve të siguruara nga Veriu.info, më 6 shkurt 2024 Inspektorati i Punës ka realizuar inspektimin e rregullt në kompaninë “Mai Group” Sh.P.K. ku ka gjetur shkelje të dispozitave të ligjit të punës për pajisjet mbrojtëse personale në vendin e punës. Ky inspektim është kryer në vendpunishten e investitorit “EuroAsphalt” Sh.P.K., e cila nuk ka të bëjë asgjë më vendpunishten e investitorit Xheladin Pozhegu ku para disa ditësh humben jetën dy punëtorë.

Më këtë rast Inspektorati i Punës ka nxjerrë vendim me të cilin e ka gjobit kompaninë “Mai Group” Sh.P.K. me gjobë simbolike prej 500 euro. Kjo gjobë ishte shqiptuar pasi që ishte konstatuar se punëtorët e “Mai Group” Sh.P.K. nuk kishin helmeta mbrojtëse.

Ndërsa, inspektorët e Punës me rastin e riinspektimit në “Mai Group” Sh.P.K. një muaj më vonë, mars 2025, janë gjetur prapë shkelje të ligjit të punës, ku kjo kompani është gjobitur prapë me gjobë simbolike prej 1200 euro, pasi që është gjetur se tetë (8) punëtorë nuk ishin të lajmëruar për kontribute pensionale, që faktikisht i bie se nuk kanë pasur kontrata te rregullta.

Pra, inspektimi i parë lidhet me kushtet e punës, por nuk ka të bëjë asgjë me vendopunishten ku ka ndodhur vdekja aksidentale e dy punëtorëve muajin e kaluar, ndërsa riinspektimi ka të bëjë me kontratat e punës të “Mai Group” Sh.P.K. dhe nuk ka të bëjë asgjë as me kushtet e punës e as me vendpunishten e investitorit N.T.Sh. “Shefqet” Sh.P.K. me pronar Xheladin Pozhegu.

Ndryshe, pas vdekjes së dy punëtorëve më 21 korrik, policia ka arrestuar investitorin Xheladin Pozhegu dhe punëkryerësin Albert Margegaj, të cilëvë me vendim të gjykatës u është shqiptuar masa e arrestit shtëpiak./Veriu.info/

Vdekja e dy punëtorëve në Gjakovë, Gjykata vendos arrest shtëpiak ndaj të pandehurve Xheladin Pozhegu dhe Albert Margegaj

Prokuroria jep detaje se për çka i do në burg biznesmenët Pozhegu e Margegaj, “Dërrasa u thye, punëtorët ranë nga 9 metra lartësi, nuk kishin helmeta e as litar”

Ky është biznesmeni Xheladin Pozhegu, i arrestuari për rastin e vdekjes së dy punëtorëve në Gjakovë

Prokuroria kërkon paraburgim për dy të arrestuarit për vdekjen e dy punëtorëve dje: Vendi i punës s’kishte as skele, as mbrojtëse

Këta janë dy të arrestuarit për incidentin në Gjakovë ku humbën jetën tragjikisht dy punëtorë – Rasti po hetohet për rrezikim të sigurisë në vendin e punës