Komuna e Prishtinës po përballet me një krizë të thellë financiare, e cila po reflektohet drejtpërdrejt edhe në aktivitetet kulturore të kryeqytetit.
Për shkak të përmbarimeve të shumta që kanë ardhur si rezultat i rasteve të humbura në gjykata, përmbaruesit privatë po i marrin mjete buxhetore nga llogaria e komunës, duke bllokuar kështu funksionimin normal të disa drejtorive, përfshirë edhe atë të Kulturës, ka mësuar Demokracia.com.
Kjo situatë ka ndikuar që Drejtoria e Kulturës, e udhëhequr nga Sibel Halimi, të mos shpallë ende listën e fituesve të thirrjes publike për subvencione në fushën e kulturës, e cila ishte hapur më 23 mars 2025. Thirrja kishte për qëllim mbështetjen e festivaleve, muzikës, manifestimeve, kinematografisë, si dhe aktiviteteve vjetore të organizatave dhe operatorëve kulturorë.
Në dokumentin zyrtar të thirrjes, Komuna kishte premtuar mbështetje “me transparencë të plotë dhe pa kurrfarë diskriminimi” për individët dhe organizatat joqeveritare që veprojnë në fushën e kulturës. Por, realiteti duket larg këtyre zotimeve, në vitin e kaluar, lista e përfituesve ishte publikuar në korrik, ndërsa këtë vit, as në mesin e gushtit nuk ka ndonjë njoftim zyrtar.
Demokracia.com ka kontaktuar dy herë me Drejtorinë e Kulturës për të marrë një shpjegim mbi arsyet e vonesës, por deri më tani nuk ka marrë asnjë përgjigje.
Nëse bllokada financiare vazhdon, jo vetëm që do të preket kalendari kulturor i Prishtinës, por do të dëmtohet edhe besueshmëria e Komunës ndaj sektorit kulturor, i cili tashmë funksionon me mjete të kufizuara dhe varet kryesisht nga këto subvencione.
Ka pasur akuza nga kryetari i Komunës së Prishtinës, Përparim Rama, ndaj Ministrisë së Financave për bllokimin e financimeve të komunës.
Në korrik 2025, Përparim Rama akuzoi ministrat Hekuran Murati dhe Elbert Çeku për bllokimin e projekteve në Prishtinë, duke thënë se Qeveria po ua bllokonte qytetarëve të Prishtinës mbi 28 milionë euro të parapara për 172 projekte kapitale, përfshirë rrugë, shkolla, çerdhe, biblioteka, ujësjellës dhe parqe.
Në një tjetër deklaratë, ai e cilësoi bllokadën e Qeverisë ndaj Prishtinës si “puro politike”, duke theksuar se buxheti i komunës ishte miratuar më 9 dhjetor të vitit të kaluar, por ende nuk ishte implementuar për shkak të ndërhyrjeve nga niveli qendror.
