Presidenti i ShBA-së, Donald Trump, tha të shtunën se Ukraina duhet të bëjë një marrëveshje për t’i dhënë fund luftës me Rusinë sepse “Rusia është një fuqi shumë e madhe, dhe ata nuk janë”, pasi e priti një samit ku Vladimir Putin u raportua se kishte kërkuar më shumë tokë ukrainase.
Në një telefonatë me presidentin ukrainas Volodymyr Zelensky, një burim e citoi Trumpin të ketë thënë se udhëheqësi rus kishte ofruar të ngrinte shumicën e vijave të frontit nëse forcat e Kievit do të lëshonin të gjithë Donetskun, rajonin industrial që është një nga objektivat kryesore të Moskës.
Zelensky e hodhi poshtë kërkesën, tha burimi sipas Reuters. Rusia tashmë kontrollon një të pestën e Ukrainës, duke përfshirë rreth tre të katërtat e provincës Donetsk, në të cilën hyri për herë të parë në vitin 2014.
Trump tha gjithashtu se kishte rënë dakord me Putinin që një marrëveshje paqeje duhet të kërkohet pa armëpushimin paraprak që Ukraina dhe aleatët e saj evropianë, deri më tani me mbështetjen e ShBA-së, kanë kërkuar.
Zelenskiy tha se do të takohet me Trumpin në Uashington të hënën, ndërsa aleatët evropianë të Kievit mirëpritën përpjekjet e Trump, por u zotuan të mbështesin Ukrainën dhe të shtrëngojnë sanksionet ndaj Rusisë. Burimi tha se udhëheqësit evropianë ishin ftuar gjithashtu të merrnin pjesë në bisedimet e së hënës, shkruan Reuters
