Shkruan: Kenan Gashi
Publikimi i votës përbën shkelje ligjore dhe kërkon reagim të menjëhershëm institucional, sepse cenon dhe ul integritetin e procesit zgjedhor
Publikimi i votës nga ana e qytetarëve përbën shkelje ligjore, për të cilën Prokuroria e Shtetit dhe Policia e Kosovës duhet të ndërmarrin veprimet e nevojshme në përputhje me kompetencat e tyre ligjore.
Kjo dukuri është e rregulluar qartë me Ligjin për Zgjedhjet dhe njëkohësisht është e sanksionuar me Kodin Penal të Republikës së Kosovës.
Zbatimi i ligjit duhet të jetë i barabartë për të gjithë, pa përjashtime dhe pa standarde të dyfishta. Ashtu siç janë ndërmarrë masa ndaj qytetarëve që kanë fotografuar apo incizuar votën e tyre, veprime të njëjta duhet të ndërmerren edhe ndaj çdo rasti tjetër të shkeljes, pavarësisht nga statusi apo sjellja e personave të përfshirë.
Komisioni Qendror i Zgjedhjeve (KQZ) duhet të ndërmarrë veprime të menjëhershme në përputhje me legjislacionin në fuqi dhe të aplikojë sanksionet e parapara me ligj ndaj personave që kanë shkelur rregullat zgjedhore, përfshirë edhe anulimin e votave të tyre, me qëllim të ruajtjes së integritetit dhe besueshmërisë së procesit zgjedhor.
