Në kuadër të një hulumtimi për parregullsitë në sektorin privat të shëndetësisë, Veriu.info ka siguruar një vendim të Inspektoratit Shëndetësor të Ministrisë së Shëndetësisë me të cilin është gjobitur me pesë (5) mijë euro IPSh (Institucioni Privat Shëndetësor) “Elab Kosova Sh.P.K.”.
Në arsyetimin e vendimit të siguruar nga Veriu.info, Inspektorati i Shëndetësisë ka gjetur se laboratori “Elab Kosova Sh.P.K.” nga data 20 shkurt 2025 deri më 16 prill 2025 ka punuar pa licencë për ushtrimin e veprimtarisë, më saktësisht me licencë të skaduar, gjë që është rreptësisht e ndaluar.
Po ashtu është zbuluar se ‘teknologu’ Alban Ukmata ka punuar kundërligjshëm, pasi i njëjti nuk është i lajmëruar në DLA (Divizionin për Licencim dhe Akreditim) si personel në këtë institucion privat shëndetësor, raporton Veriu.info.
Në raportin e inspektimit të Inspektorëve Shëndetësorë konstatohet se “Elab Kosova Sh.P.K.” ka ofruar shërbime shëndetësore laboratorike biokimike hematologjike për 478 pacientë pa poseduar licencë për ushtrimin e veprimtarisë.
Skandali i “Elab Kosova Sh.P.K.” nuk përfundon me kaq, pasi që ky laborator ka kryer shërbime laboratorike mikrobiologjike pa licencë për 705 pacientë.
Inspektorati Shëndetësor ka gjetur se laboratori “Elab Kosova Sh.P.K.” në raportet e analizave laboratorike biokimike hematologjike të pacientëve V.B.F, J.Q.R. dhe D.G. nuk kishte nënshkrim apo faksimil të specialistit që i validon ato.
Tutje, në raport përshkruhet se si “Elab Kosova Sh.P.K.” ka ofruar si shërbime testet laboratorike për detektimin e infeksionit me Hepatit B, Hepatit C dhe testet e laboratorike për detektimin e infeksionit HIV, edhe pse laboratori nuk kishte pasur licencë për këto shërbime.
Në faqen 6 të raportit thuhet se në fund të inspektimit laboratorit “Elab Kosova Sh.P.K.” i është ndaluar ushtrimi i veprimtarisë shëndetësore deri në pajisjen me licencë nga Ministria e Shëndetësisë. Gjithashtu i është ndaluar ushtrimi i veprimtarisë Alban Ukmatës deri në lajmërim dhe licencim si personel në DLA, sikundër që është ndaluar ofrimi i shërbimeve të palicencuara të analizave për detektimin e Hepatit B, Hepatit C dhe HIV.
Inspektorët shëndetësor kanë gjetur se laboratori “Elab Kosova Sh.P.K.” nuk e ka të kompletuar Antishok terapinë, e cila është e domosdoshme për jetën e pacientëve në rast se gjërat komplikohen gjatë ofrimit të shërbimeve.
Në Agjencinë e Regjistrimit të Bizneseve të Kosovë ky laborator figuron nën pronësinë e “Elab fulya tibbi tahlil laborator hizmetleri anonim sirketi”, kompani laboratorike kjo me bazë në Turqi ku si drejtoreshë figuron Pinar Er, e cila në publik prezantohet si pronare e kompanisë.
Veriu.info u ka drejtuar pyetje dy ditë më parë “Elab Kosova Sh.P.K.” lidhur me të gjeturat e Inspektoratit Shëndetësor, por deri në publikimin e këtij shkrimi nuk ka pranuar përgjigje.
LEXONI EDHE:
