Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një raport të Inspektoratit Shëndetësor të Ministrisë së Shëndetësisë për riinspektim sipas të cilit është mbyllur Njësia e Sterilizimit në United Hospital, spital privat i themeluar nga kirurgu Fatos Kojqiqi.
Sipas këtij raporti shumëfaqësh të Inspektoratit Shëndetësor, problemi kishte nisur rreth gjashtë muaj më herët, kur një infermiere – që ishte e vetmja e licencuar për punë në njësinë e sterilizimit – kishte dhënë dorëheqje. Megjithatë, spitali nuk e kishte larguar atë nga sistemi zyrtar i Ministrisë së Shëndetësisë.
Arsyeja ishte e qartë: pa këtë infermiere të regjistruar në sistem, njësia e sterilizimit nuk do të mund të funksiononte. Infermierja ishte ankuar në Inspektoratin Shëndetësor, ndërsa Inspektorati e kishte paralajmëruar disa herë spitalin që ta largonte nga sistemi.
Pavarësisht paralajmërimeve kjo prapë nuk kishte ndodhur.
Veriu.info ka siguruar edhe e-mailet përmes të cilave infermierja ishte ankuar, por kot. Halli i saj nuk po zgjidhej, e nga kjo situatë po vazhdonte të përfitonte padrejtësisht spital privat i Fatos Kojqiqit.
Megjithatë, përfundimisht në janar 2025, Inspektorati Shëndetësor ndërhyri me anë të një ri-inspektimi, duke konstatuar se United Hospital po vepronte kundërligjshëm duke e mbajtur peng në sistem infermieren Ema Latifi, e cila kishte dhënë dorëheqje gjashtë muaj më parë.
Me këtë rast Inspektorati mbylli Njësinë e Sterilizimit në United Hospital, duke e shoqëruar vendimin edhe me gjobë ndaj këtij spitali.
Veriu.info ka siguruar shkresat zyrtare të kësaj lënde, procesverbalin e inspektimit, si dhe fotografitë nga terreni që dokumentojnë mbylljen e njësisë së sterilizimit.
Ne kemi dërguar pyetje në spitalin e Fatos Kojqiqit më 5 janar, por akoma nuk kemi marrë përgjigje në lidhje me këtë çështje.
Për më shumë detaje mund ta shihni videon më poshtë dhe nën të dokumentet lidhur me këtë çështje:
LEXO EDHE:
